Qańtar aıynda bıýdjetke túsken kedendik tólemder men salyqtardyń mólsheri 20 paıyzǵa artty
Bul málimetterdi búgin Qazaqstan Prezıdentimen kezdesýi barysynda Qarjylyq monıtorıng agenttiginiń tóraǵasy Janat Elımanov keltirdi, dep habarlaıdy QazAqparat.
Janat Elımanovtyń aıtýynsha, elde múddeli organdarmen birlesip, qolma-qol valıýtany zańsyz shyǵarýǵa baqylaý kúsheıtilgen. Jalpy somasy 5 mıllıon AQSh dollaryna jýyq zań buzýshylyq anyqtalǵan. Sonymen qatar Qazaqstan-qytaı shekarasynda tekserý jumystary júrgizilip jatyr. Úsh aptanyń ishinde taýardy zańsyz ákelý faktileri boıynsha 8 qylmystyq jáne 24 ákimshilik is qozǵaldy. Nátıjesinde, taýar ımporty kóleminiń azaıýyna qaramastan, bıylǵy qańtar aıynda bıýdjetke túsken kedendik tólemder men salyqtardyń mólsheri 20 paıyzǵa (26,6-dan 31,7 mlrd teńgege deıin) ósti.
Kezdesýde Memleket basshysyna qoǵamdaǵy mańyzdy áleýmettik máselelerdi sheshýge baǵattalǵan jumystar týraly málimet berildi. Atap aıtqanda, «Tarıf» jobasy boıynsha kommýnaldyq qyzmetterdiń 17 mıllıard teńgege ósýine ákep soqtyrýy múmkin 1,3 mıllıon azamattyń negizsiz shyǵynyna jol berilmedi. 13 is qozǵaldy (sýmen jabdyqtaý – 8, gazben jabdyqtaý – 3, jylýmen jabdyqtaý – 2). Prezıdent jarııalaǵan Balalar jyly aıasynda Bala quqyqtary jónindegi ýákilmen birlesip, «Qamqor» jobasy júzege asyrylýda. Bul joba halyqtyń áleýmettik jaǵdaıy tómen toptaryn qorǵaýǵa baǵyttalǵan. Nátıjesinde 45 is boıynsha 800 jetim balanyń quqyǵy qorǵaldy. Kezdesý qorytyndysy boıynsha Memleket basshysy kóleńkeli ekonomıkaǵa qarsy kúresý úshin Agenttik tóraǵasyna tıisti sharalar qabyldaý jóninde tapsyrma berdi.
Prezıdent zańsyz ıemdelgen aktıvterdi, sonyń ishinde shetelden izdeýge basa mán berý qajet ekenin, sondaı-aq olardy Qazaqstanǵa qaıtarý jumystaryn jandandyrý kerektigin aıtty. Bul jumystardyń bári tulǵanyń kim ekenine jáne laýazymyna qaramaı júrgizilýge tıis.