Qańtar aıynda elektrondy eńbek bırjasynda jumys izdeýshiler eki ese ósken

ASTANA. KAZINFORM &ndash; <p>Qańtar aıynda Elektrondyq eńbek bırjasynda (EEB) jumys berýshiler 97,3 myń bos jumys ornyn, al jumys izdeýshiler 191,1 myń túıindeme ornalastyrdy. Ótken jyldyń jeltoqsan aıymen salystyrǵanda bos oryndar sany 22,3 myńǵa (-19%) azaıdy, al túıindeme sany 132 myń birlikke (+223%) ósti.</p>

Osylaısha, qańtar aıynda jumys berýshilerdiń suranysy jumys izdeýshilerdiń eńbek bırjasyndaǵy usynystarynyń jartysyna teń boldy, bul jyl basyndaǵy rekrýtıngtik protsesterdiń tómendeýimen túsindiriledi.

Óńirler bólinisinde qańtar aıynda túıindemeler sanynyń ósýi barlyq óńirlerde baıqaldy, eń az ósim Astana qalasynda tirkeldi (+3,2 myń túıindeme nemese jeltoqsanmen salystyrǵanda 56 %-ǵa kóp). Eńbek naryǵyndaǵy usynystyń ósýiniń eń joǵary kórsetkishterin ońtústik óńirler: Qyzylorda oblysy (+17,2 myń túıindeme nemese 531 %), Shymkent qalasy (+9,7 myń túıindeme nemese 401%) jáne Túrkistan oblysy (+27 myń túıindeme nemese 358 %) kórsetti.

«Óz kezeginde qańtar aıynda ornalastyrylǵan bos oryndar sany aldyńǵy aımen salystyrǵanda edáýir tómendegeni ońtústik óńirlerde de baıqalady: Qyzylorda (-4,5 myń nemese -61%) jáne Túrkistan (-7,4 myń bos oryn nemese - 48%) oblystarynda jáne Almaty qalasynda (-8 myń nemese -47 %)», – dep habarlady «ERDO» AQ Strategııa jáne úlken derekterdi taldaý departamentiniń basqarma basshysy Kamılla Manakova.

Qańtar aıynda joǵary bilikti mamandarǵa suranystyń eń joǵary ósýi (45 %-ǵa nemese 9,9 myń bos orynǵa) baıqaldy. Jumys berýshiler tarapynan ortasha bilikti mamandarǵa degen suranys ótken jyldyń jeltoqsan aıyndaǵy deńgeıden 4 %-ǵa (2 myń bos oryn) tómendedi. Bir mezgilde qańtar aıynda biliktiligi joq personalǵa suranystyń aıtarlyqtaı tómendeýi baıqalady – 58% - ǵa (30,2 myń bos jumys orny).

Qańtar aıynda ornalastyrylǵan túıindemelerge keletin bolsaq, olardyń sanynyń aıtarlyqtaı ósýi biliktiligi joq jumys izdeýshiler tarapynan bolǵan belsendiliktiń nátıjesinde boldy, olardyń sany ótken aımen salystyrǵanda 549% - ǵa (nemese 71,8 myń túıindeme) ósti. Bul rette belsendilik joǵary (túıindeme sanynyń 109 %-ǵa nemese 22,1 myń túıindemege ósýi) jáne ortasha biliktiligi (+147% nemese 38,1 myń) jumys izdeýshiler tarapynan da baıqaldy.

«Qańtar aıynda eń kóp bos jumys oryndary «bilim jáne tárbıe» (17,5 myń bos jumys orny) jáne «medıtsına jáne farmatsevtıka» (8,5 myń) kásiptik salalarynda ornalastyryldy. Óz kezeginde EEB-da jumys izeýshiler arasynda «bilim jáne tárbıe» (17,3 myń túıindeme) jáne «TKSh jáne abattandyrý» (8,2 myń túıindeme) kásiptik salalarynyń qyzmetkerleri tarapynan belsendilik baıqaldy», – dep bólisti Kamılla Manakova.

Jalaqynyń eń joǵary mólsherin kóbine óz túıindemelerinde «úlken derektermen jumys jónindegi maman» (orta eseppen 1,3 mln teńgeden bastap), «bıznes-protsesterdi ońtaılandyrý jónindegi basshy» (1,2 mln teńgeden bastap), sondaı-aq «óndiristik operatsııalar jónindegi ınjener» (1,2 mln teńgeden bastap) mamandyqtary boıynsha jumys izdeýshiler suraǵan.

Eń kóp jalaqyny jumys berýshiler óndiristegi baza bastyqtaryna (900 myń teńgeden bastap), jobalaýshy ınjenerlerge (800 myń teńgeden bastap) jáne bas qurylysshylarǵa (790 myń teńgeden bastap) usyndy.

Jalpy, qańtar aıynda EEB-da biliktiligi joq jumys kúshine suranystyń tómendeýi jáne «bilim jáne tárbıe» jáne «medıtsına jáne farmatsevtıka» kásiptik salalaryndaǵy mamandarǵa joǵary suranys baıqaldy.