Qant zaýyttaryna aınalym shemasy boıynsha 18,3 mlrd teńge bólindi - Saýda mınıstrligi

ASTANA. QazAqparat - Premer-Mınıstrdiń orynbasary – Saýda jáne ıntegratsııa mınıstri Serik Jumanǵarınniń tóraǵalyǵymen ótken keńeste qant zaýyttaryn aınalym shemalary boıynsha qarjylandyrý barysy men otandyq qant óndirisiniń jaǵdaıy talqylandy, dep habarlaıdy QazAqparat.

Saýda jáne ıntegratsııa birinshi vıtse-mınıstri Arman Shaqqalıevtiń aıtýynsha, búginde 18 óńir shıki qantty satyp alý jáne qaıta óńdeý úshin 18,3 mlrd teńge somasynda qant zaýyttaryn qarjylandyrdy.

«Aqsý Kant» zaýyty sońǵysy bolyp qalǵan edi, biraq onymen Almaty ÁKK 2,6 mlrd teńgege taýar jetkizýge kelisimshartqa qol qoıdy», – dedi Arman Shaqqalıev.

Aýyl sharýashylyǵy mınıstrliginiń derekteri boıynsha Qazaqstannyń qant zaýyttarynyń jalpy táýliktik qýaty qant qyzylshasyn óńdeý boıynsha 8,7 myń tonnany jáne qamys shıkizaty boıynsha 2,4 myń tonnany quraıdy. Bul rette elimizde qantty jyldyq tutyný – 530-550 myń tonna, otandyq shıkizat esebinen qamtamasyz etý – 10%-dan az.

«2022 jyly ishki naryqty otandyq shıkizatty qaıta óńdeý esebinen qantpen qamtamasyz etý 51%-dy qurady, onyń ishinde qyzylsha qant esebinen – 6% (33 myń tonna). Bıyl zaýyttar 400-450 myń tonnaǵa jýyq qant óndirýdi josparlap otyr, onyń ishinde 50 myń tonna qyzylsha shıkizatynan, qalǵan kólemi shıki qamys qantynan óndirilmek. Osy maqsatta Jambyl jáne Jetisý oblystarynyń ákimdikteri qant qyzylshasynyń egis alqaptaryn 6,5 myń gektarǵa (11,6 tonna gektardan 18,1 tonna gektarǵa deıin) keńeıtý jumystaryn júrgizýde», – dedi aýyl sharýashylyǵy vıtse-mınıstri Erbol Tasjúrekov.

Sonymen qatar qant salasyn qoldaý úshin Aýyl sharýashylyǵy mınıstrligi óńdeýge tapsyrylǵan qant qyzylshasynyń kólemi úshin sýbsıdııalar normatıvterin tonnasyna 15 myń teńgeden 25 myń teńgege deıin ulǵaıtty.

2022 jyly Jetisýda ornalasqan Aqsý qant zaýytynyń jumysy toqtatyldy. Qazir zaýytta qýaty aıyna 10 myń tonna qamys shıkizatyn óńdeý jelisin ornatý jumystary júrgizilýde.

Jetisý ákimdiginiń málimetinshe, zaýytta 3 myń tonna qamys shıkizaty satyp alynǵan, «Aqsý kant» JShS qamys shıkizatyn qaıta óńdeý boıynsha tehnologııalyq jeliniń daıyndyǵy – 98%.

Qoldanystaǵy problemalardyń biri – qanttyń sońǵy qunyna áser etetin mazýttyń joǵary quny. Óz tarapynan energetıka vıtse-mınıstri Maǵzum Maǵaýov qazirgi ýaqytta mazýt baǵasy iri shıkizat ıegerleri arasynda 100-den 130 teńge/kg-ǵa deıin tómendegenin habarlady. Ol shıkizat ıeleriniń osy baǵalar boıynsha kelisimshart jasasýǵa daıyn ekenin rastady.

Keńes qorytyndysy boıynsha Serik Jumanǵarın ákimdikke Aqsý qant zaýytyn qysqa merzimde iske qosýdy, al Energetıka mınıstrligine óndirýshimen mazýt jetkizýge kelisimshart jasasý boıynsha qant zaýytyna járdem kórsetýdi tapsyrdy.