Qant óndirýshilerdi baǵa dempınginen qorǵaý tetigi engizildi – AShM

ASTANA. QazAqparat – Qyzylsha ósirýge arnalǵan tehnıkaǵa ınvestıtsııalyq sýbsıdııalar normatıvi eki esege deıin artty. Bul týraly Senatta ótip jatqan Úkimet saǵatynda Aýyl sharýashylyǵy mınıstri Erbol Qarashókeev aıtty, dep habarlaıdy QazAqparat tilshisi.

«Otandyq qant óndirý salasyn nyǵaıtý jáne ımportqa táýeldilikti tómendetý maqsatynda bes jyldyq kezeńge arnalǵan Qant salasyn damytý jónindegi keshendi jospar iske asyrylyp jatyr. Onyń aıasynda shıkizatty qaıta óńdeýge tapsyrý kezinde sýbsıdııalar normatıvin 15 teńgeden 25 teńgege deıin arttyrý arqyly fermerlerdi yntalandyrý iske asyrylyp otyr», - dedi E. Qarashókeev.

Onyń aıtýynsha, qyzylsha ósirýge arnalǵan egý keshenderine, tehnıkaǵa ınvestıtsııalyq sýbsıdııalar normatıvi 25-ten 50%-ǵa deıin artty. Budan basqa, qant qyzylshasyn ósirýge bazalyq sýbsıdııalar saqtaldy.

Aınalym qarajatymen qamtamasyz etý úshin qant zaýyttaryna Áleýmettik-kásipkerlik korporatsııalar arqyly 0,1% mólsherleme boıynsha 18 mlrd teńge somasynda jeńildetilgen nesıe berildi.

«Bıyl 22 sáýirden bastap 350 myń tonna kóleminde úshinshi elderden quraq qanty shıkizatyn bajsyz ákelýge tarıftik jeńildik qoldanylyp otyr. Qant óndirýshilerdi baǵa dempınginen qorǵaý úshin qanttyń eń tómengi kóterme baǵasyn engizý tetigi ázirlendi», - dedi mınıstr.

Onyń sózine qaraǵanda, bıyl qant qyzylshasynyń egis alańdary 64% ulǵaıdy.