Qant qyzylshasynyń sapasyzdyǵynan zaýyt shyǵynǵa ushyraıdy - qaýymdastyq prezıdenti

ASTANA. QazAqparat – Fermerler zaýyttarǵa shirigen jáne qoqys aralasqan qant qyzylshasyn tapsyrady. Bul týraly OKQ-de ótken brıfıngide «Qazaqstan qant, tamaq jáne qaıta óńdeý ónerkásibi qaýymdastyǵy» zańdy tulǵalar birlestiginiń prezıdenti Aıjan Abaqanqyzy osylaı málimdedi, dep habarlaıdy QazAqparat tilshisi.

«Ótken jyly fermerler óz ónimderin zaýytqa ótkizgennen keıin úshinshi kúni aqshalaryn aldy. Bizde fermerlerge qatysty másele bar. Máselen, byltyrǵy qant qyzylshasynyń sapasy óte nashar boldy. Qyzylsha shirigen, qoqys aralasqan. Odan qant shyqpaıdy», - dep málim etti Aıjan Abaqanqyzy.

Aıtýynsha, zaýytqa tas pen ózge de bógde zattar aralasqan ónim tapsyrylady.

«Qazir fermerler qyzylshany kombaınmen jınaıdy. Tehnıka qyzylshamen birge tastar men sýarýǵa arnalǵan shlangylardy da jınap alady. Keıin ony zaýytqa ákeledi. Mundaı ónimmen jumys isteý qaýipti. Óıtkeni, qant qyzylshasymen birge kelgen qoqystar men shlangylar zaýyttyń óńdeý jelisine túsedi. Tıisinshe, barlyq qurylǵylardy zaqymdaıdy. Nátıjesinde zaýyt barlyq protsesti toqtatýǵa májbúr bolady. Bul shyǵyn fermerlerge emes, zaýytqa aýyrtpashylyq salady», - dep atap ótti ol.

Eske sala keteıik, buǵan deıin Aıjan Abaqanqyzy sý bolmasa, qant qyzylshasy alqabyn keńeıtýdiń mańyzy joq ekenin aıtqan edi.

Foto: agronom.com.ua