Qant qyzylshasyn otyrǵyzýǵa árbir oblys qatysýy tıis - Saparhan Omarov
«Іshki naryqty otandyq óndiristiń qantymen molaıtý jónindegi josparlar týraly aıtpas buryn, ótken 5 jyldaǵy jumys nátıjelerine toqtala ketýge ruqsat etińizder. Statıstıka kórsetip otyrǵandaı, osy ýaqyt ishinde qant qyzylshasy egistikteriniń alańy 9,8 ese, qant qyzylshasynyń ónimdiligi 1,3 ese, al jalpy jıyny 20 eseden astam ulǵaıdy. Bul faktiler otandyq qant salasynyń damý áleýetin taǵy da rastaıdy, ol úshin qant qyzylshasynyń egis alańyn keminde 2 ese ulǵaıtý qajet. 90-shy jyldary respýblıkanyń 13 óńirinde qant qyzylshasy otyrǵyzylǵanyn eskere otyryp, bul jumysqa árbir oblys qatysýy tıis dep esepteımiz», - dedi mınıstr Úkimet otyrysynda.
Onyń sózine qaraǵanda, qazirgi kezde otandyq óndiris qantynyń tapshylyǵy 240 myń tonnany nemese qajettiliktiń jartysynan astamyn quraıdy. Qant qyzylshasy egisterin ulǵaıtý, zamanaýı agrotehnologııalardy, sapaly tuqymdardy paıdalaný jáne tehnıkalyq qaıta jaraqtandyrý esebinen onyń ónimdiligi men sapasyn arttyrý arqyly ishki naryqty molaıtý boljanyp otyr.
«Jumys istep turǵan 4 qant zaýytyn jańǵyrtý, sondaı-aq Jambyl jáne Pavlodar oblystarynda jańa qant zaýyttaryn salý jobalaryn iske asyrý qosymsha 180 myń tonna qant óndirý arqyly tapshylyqty qysqartýǵa jáne qamtamasyz etý boıynsha 80 paıyzǵa shyǵýǵa múmkindik beredi. Bul halyqtyń qantqa degen qajettiligin tolyqtaı qamtamasyz etýge jaǵdaı týǵyzady. Qazirdiń ózinde ınvestıtsııalyq sýbsıdııalaý, óńdeýge tapsyrylǵan qant qyzylshasynyń ár tonnasyn sýbsıdııalaý túrindegi salany qoldaý sharalary qabyldandy. Keshendi josparda salany qoldaýdyń ózge de sharalaryn iske asyrý josparlanyp otyr», - dedi S. Omarov.