Qańǵybas ıtterdiń sanyn óltirmeı-aq retteýge bolady – Serikqalı Brekeshev

NUR-SULTAN. QazAqparat – Ortalyq kommýnıkatsııalar qyzmetinde ótken brıfıngide QR Ekologııa, geologııa jáne tabıǵı resýrstar mınıstri Serikqalı Brekeshevke qańǵybas ıtterdiń sanyn retteý týraly suraq qoıyldy, dep habarlaıdy QazAqparat tilshisi.

Mınıstr bul másele arnaıy zań jobasynda egjeı-tegjeı qarastyrylǵanyn atady.

«Janýarlardy kútip ustaý jaýapkershiligi týraly» zań jobasynyń 24-baby boıynsha olardy aýlaý, ýaqytsha ustaý, óltirý sharalary Qazaqstan zańnamasyna sáıkes júzege asyrylady. Zań jobasynyń 25-babynyń 2-tarmaǵy boıynsha, qańǵybas janýarlardyń sanyn ýlaý, hımıkattar paıdalaný sııaqty kez kelgen tásilmen óltirý arqyly retteýge tyıym salynady. Bul janýarlarǵa gýmandy qarym-qatynas tanytý qaǵıdaty men halyqtyń densaýlyǵyn, ómirin qaýip-qaterden qorǵaý qaǵıdattaryn teńgerimde qoldaný arqyly iske asýy kerek», -dedi ol.

Sondaı-aq, Serikqalı Brekeshev atalǵan qujatta tipti osy iske mamandanǵan mekeme ókilderine shekteý qoıylatynyn atady.

«Bul erejede janýar aýlaý qyzmetterine haıýandardy basqa jaǵdaılarda da óltirýge tyıym salynady. Zań jobasynyń eń negizgi ıdeıasy qańǵybas janýarlardyń sanyn gýmandy joldarmen retteý arqyly óltirýge tyıym salýǵa baǵyttalǵan. Bul: aýlap ustaý, ıesin tabý, vaktsınalaý, sterıldeý jáne erkin tabıǵatqa jiberý. Sonymen birge, qańǵybas janýarlardy aýlap, óltirýge qarastyrylǵan qarajatty tolyqtaı jańa tásildi iske asrýǵa baǵyttaý kózdelip otyr», - dedi mınıstr.