«Kanelo» taǵy bir chempıondyq belbeýge ıe boldy

NUR-SULTAN. QazAqparat – meksıkalyq boksshy Saýl «Kanelo» Alvares (54-1-2, 36 KO) The Ring jýrnalynyń nusqasy boıynsha sýper orta salmaqtaǵy chempıon belbeýin ıelendi.

Buǵan ol jeltoqsan aıynda brıtandyq Kallým Smıtti (27-1, 19 KO) jeńgennen keıin ıe boldy, dep habarlaıdy QazAqparat Sports.kz -ke silteme jasap.

«Kanelo» úshin Bul The Ring-tiń úshinshi belbeýi jáne olardyń barlyǵyn túrli salmaq dárejelerinde ıelengen: birinshi orta, orta jáne sýper orta.

Eske salaıyq, Smıtti jeńgen Alvares WBA Super nusqasy boıynsha álem chempıony ataǵyn alǵan bolatyn. Sondaı-aq WBC belbeýin de ıelengen. Kelesi jekpe-jegin «Kanelo» 27 aqpanda túrik Avnı Iyldyrymǵa (21-2, 12 KO) qarsy ótkizedi. Meksıkalyq utysqa birden eki belbeýin qoıady.

Al qazaqstandyqtar Golovkın – «Kanelo» trılogııasynyń sońǵy jekpe-jegin kútýde.

ESPN Deportes kópultty sport arnasynyń aqparaty boıynsha, Gennadıı Golovkın – Saýl «Kanelo» Alvarestiń jekpe-jek trılogııasynyń sońǵy bóligi osy jyldyń qyrkúıek aıynda ótýi múmkin.