Densaýlyq saqtaý mınıstri Batys Qazaqstan oblysynda medıtsınalyq nysandar jumysymen tanysty

<p>ORAL. KAZINFORM &mdash; QR Densaýlyq saqtaý mınıstri Aqmaral Álnazarova Batys Qazaqstan oblysyna jasaǵan jumys sapary barysynda Qaratóbe, Syrym aýdandarynda jáne Oral qalasynda birqatar medıtsınalyq nysandarda boldy.</p>

BQO densaýlyq saqtaý basqarmasynyń baspasóz qyzmetinen málim etkenindeı, sala basshysy sonymen qatar ýaqytsha evakýatsııalaý pýnktterinde ornalasqan turǵyndarmen kezdesip, saýaldaryn tyńdardy. 

– Elimizdiń birqatar óńirlerinde oryn alǵan jaǵdaıǵa baılanysty Memleket basshysynyń tikeleı tapsyrmasymen halyqtyń jaǵdaıyn bilý maqsatynda ortańyzǵa keldik. Elimiz boıynsha tasqyn sýdan zardap shekken aýyl turǵyndaryna memleket tarapynan barlyq baǵytta kómek kórsetilip jatyr. Densaýlyq saqtaý salasy tarapynan evakýatsııalyq pýnktterdegi halyqqa qajetti medıtsınalyq kómek, tegin dári-dármekpen qamtamasyz etý, sý tasqyny bolǵan aımaqtarda juqpaly aýrýlardyń taralyp ketpeýin qadaǵalaý, aýyz sý, tazalyq máselesin qadaǵalaý t.b. jumystar jasalyp jatyr. Sonymen qatar josparly em, sanatorlyq-kýrorttyq em uıymdastyrý múmkindikterin qarastyratyn bolamyz. Memleket tarapynan tıisti qarajat bólinip jatyr. Mundaı qıyn ýaqytta barlyǵymyz birge, aýyzbirshilikte bolyp, qıyndyqty eńseremiz degen senimdemin, - dedi Aqmaral Sháripbaıqyzy.

Budan bólek mınıstr birqatar medıtsınalyq nysandarda bolyp, ujymmen kezdesti. Evakýatsııalyq pýnktterdegi halyqqa medıtsınalyq kómek kórsetý, tegin dárilik preparattarmen qamtamasyz etý baǵytynda jumystardy jandandyrý, sonymen qatar medıtsınalyq-sanıtarlyq alǵashqy kómek kórsetý uıymdarynda qyzmettiń uıymdastyrylý jaıyn talqylap, naqty tapsyrmalar berdi.

A.Álnazarova sý tasqyny qaýpi bar aımaqta ornalasqan oblystyq kardıologııalyq ortalyq ǵımaratynda bolyp, jańa ǵımarat salý, naýqastarǵa sapaly medıtsınalyq kómek kórsetýdiń talapqa saı bolýy kerektigin jetkizdi.

Sý basý qaýpi tónýine baılanysty qalalyq kópbeıindi aýrýhana ǵımaratyna kóshirilgen oblystyq kardıologııalyq ortalyq qalypty jumys jasaýda. Júrek jáne qan tamyrlary júıesi aýrýlarymen aýyratyn patsıentter úshin ǵımaratta barlyq múmkindikter qarastyrylǵan. 
Sonymen qatar vedomstvo basshysy «Batys sý arnasy» JShS-da, zerthanada jáne oblystyq sanıtarııalyq-epıdemıologııalyq baqylaý departamentiniń saraptama ortalyǵynda boldy. Bul turǵyda Aqmaral Sháripbaıqyzy óńirdegi epıdemıologııalyq jaǵdaıdyń turaqtylyǵy, turǵyndar tutynatyn aýyz sýdyń sapasy basty nazarda ekenin tilge tıek etti.

Eske sala keteıik, budan buryn Májilis depýtaty Edil Jańbyrshınniń sý tasqyny kezinde bárine de daıyn bolýymyz kerek ekendigi týraly aıtqanyn jazǵan edik. 

Sondaı-aq Jaıyq ózenindegi sý deńgeıi Oralda bir táýlikte 13 santımetrge kóterildi.