«Kanelo» Golovkınmen úshinshi aıqasqa daıyn ekenin málimdedi

NUR-SULTAN. QazAqparat - WBC jáne WBA Super nusqalary boıynsha ekinshi orta salmaqtaǵy álem chempıony meksıkalyq Saýl «Kanelo» Alvares (54-1-2, 36 KO) jeltoqsanda qazaqstandyq Gennadıı Golovkınmen (42-1-1, 36 KO) aıqasýy múmkin ekenin joqqa shyǵarmady, dep habarlaıdy QazAqparat Sports.kz portalyna silteme jasap.

Jeksenbide Alvares túrkııalyq mindetti úmitker Avnı Iyldyrymmen (21-2, 12 KO) aıqasady, mamyrda kollektsııasyn brıtandyq Bıllı Djo Sonderstiń (30-0, 14 KO) WBO tıtýlymen tolyqtyrýǵa tyryspaq, al qyrkúıekte absolıýtti chempıon ataǵyna jetpeı turǵan amerıkalyq Kaleb Plantanyń (21-0, 12 KO) IBF belbeýin tartyp alýǵa tyrysady.

«Kez kelgen nusqaǵa daıynmyn. Bastysy boksshynyń myqty bolǵany, jankúıerlerdi aıqas qyzyqtyryp turýy kerek. Eger olarǵa Golovkınmen úshinshi jekpe-jek kerek bolsa, nege jasamasqa?», - dedi Alvares.

Eske sala ketsek, 2017 jyldyń qyrkúıeginde Golovkın men Alvares teń tústi, al týra 12 aı ótkennen keıin «Kanelo» azdaǵan upaı aıyrmashylyǵymen jeńiske jetken bolatyn.