«Kanelo» Golovkındi nokaýtqa túsirgisi keledi

NUR-SULTAN. QazAqparat – Ekinshi orta salmaqtaǵy álemdik barlyq negizgi tıtýldyń ıesi Saýl «Kanelo» Alvares qazaqstandyq Gennadıı Golovkınmen úshinshi jekpe-jegin merziminen buryn aıaqtaǵysy keletinin taǵy da basa aıtty, dep habarlaıdy QazAqparat Sports.kz portalyna silteme jasap.

Bul rette ol GGG-men belgilengen raýndtardy sońyna deıin jetkizýge ázir ekenin de aıtty. Golovkın men Kanelo arasyndaǵy buǵan deıin ótken eki jekpe-jektiń biri teń eseppen, al ekinshisi tóreshilerdiń basym bóliginiń sheshimimen meksıkalyq boksshynyń jeńisimen aıaqtalǵan edi.

«Bul jekpe-jektegi maqsatym – nokaýtqa túsirip jeńiske jetý, biraq barynsha jınaqy bolamyn. Eger nokaýt oryn alsa, jaqsy. Olaı bolmasa, 12 raýndqa da daıynmyn», - dedi Alvares tilshilerge bergen suhbatynda.

Eske salaıyq, Golovkın men Kanelo arasyndaǵy úshinshi jekpe-jek 17 qyrkúıekte (Qazaqstanda 18 qyrkúıek kúni tańerteń) Las-Vegastaǵy T-Mobile arenasynda ótedi. Aıqasty Qazaqstanda tikeleı efırden kórýge bolady.

Keshe qos boksshy Las-Vegastaǵy (AQSh, Nevada shtaty) MGM Grand oıyn-saýyq kesheninde uıymdastyrylǵan «qarsy alý saltanatyna» qatysyp, kóz arbasý ótkizdi.

Foto: sports.kz