«Kanelo» Gennadıı Golovkınmen úshinshi aıqasyna boljam jasady

NUR-SULTAN. QazAqparat – Tórt salmaq dárejesindegi álem chempıony jáne «pound-for-pound» reıtınginiń burynǵy kóshbasshysy meksıkalyq Saýl Alvares 18 qyrkúıekte Las-Vegasta (AQSh) ótetin qazaqstandyq Gennadıı Golovkınmen úshinshi aıqasy tóreshilerdiń sheshimine jetpeıdi dep esepteıdi. Bul týraly QazAqparat Sports.kz saıtyna silteme jasap habarlaıdy.

«Bizdi jaqsy jekpe-jek kútip tur. Golovkın – keremet jáne qaýipti qarsylas. Biraq, men nokaýtqa jiberemin dep oılaımyn, oǵan esh kúmán joq. Oǵan yntam zor. Rıngke oralatyn kúndi asyǵa kútip júrmin. Bar kúshimdi salyp jattyǵyp jatyrmyn. Nokaýt – bul aıqastyń jalǵyz múmkin nátıjesi», - dedi Saýl Alvares jýrnalıstermen kezdesýde.

Eske salaıyq, Kanelo men Gennadıı Golovkınniń birinshi aıqasy 2017 jyly ótip, daýly teń nátıjemen aıaqtaldy. Rematch 2018 jyly boldy jáne onda Alvares tóreshilerdiń basym daýysymen jeńiske jetti.