Qandyaǵash stantsııasynyń vagon qaraýshylary apattyń aldyn aldy

AQTÓBE. QazAqparat - Aqtóbe oblysyndaǵy Qandyaǵash stantsııasynda vagon qaraýshy-jóndeýshiler Serik Nuranov pen Almatjan Amanjolov júk vagondaryn tekserip, tehnıkalyq qyzmet kórsetý barysynda dóńgelek dıskisinen óte kúrdeli aqaýǵa jatatyn syzat tapty. Osylaısha, olar apattyń aldyn aldy, dep habarlaıdy QazAqparat «Qazaqstan temir joly» UK«AQ baspasóz qyzmetine silteme jasap.

Vagon jeke menshik ıesine tıesili. Dóńgelek juptar 1990 jyly jasalǵan. Aqaý tabylǵan soń atalǵan menshik ıesiniń vagondary erekshe baqylaýǵa alyndy.

Vagonǵa júk tıelgenin jáne dóńgelek juptarǵa salmaq túskenin eskersek, vagon qaraýshy-jóndeýshilerdiń qyraǵylyǵy júk tıelgen búkil quramdy jolda bolýy múmkin úlken bir apattan saqtap qaldy deýge bolady.

Serik Nuranov pen Almatjan Amanjolov – tájirıbeli temirjolshylar, óz isiniń bilgirleri.

Serik Nuranov temirjolda 30 jyldan beri jumys isteıdi, sonyń 28 jylynda osy bir mekemede, ıaǵnı Qandyaǵashtaǵy tehnıkalyq qyzmet kórsetý qosynynda qyzmet etip keledi. Aldymen jyljymaly quramdy jóndeý boıynsha slesar bolsa, 2006 jyldan beri vagon qaraýshy-jóndeýshi qyzmetinde.

Almatjan Amanjolovtyń temirjoldaǵy jalpy eńbek ótiline 30 jyldan asty. Osy jyldar ishinde ol Qandyaǵash tehnıkalyq qyzmet kórsetý qosynynda eńbek etip keledi. Jumysyn moıyntirekti jóndeý boıynsha tokar bolyp bastap, keıin vagon qaraýshy-jóndeýshi qyzmetine aýysqan.