Qandyaǵash-Maqat baǵytyndaǵy 327 shaqyrym jol bıyl ashylady

NUR-SULTAN. QazAqparat – Aqtóbe-Atyraý-Astrahan baǵytyndaǵy halyqaralyq joldaǵy jóndeý jumystary kólik ıelerine 500 shaqyrym joldy únemdeýge múmkindik beredi, dep habarlaıdy QazAqparat tilshisi.

Úkimet otyrysynda Indýstrııa jáne ınfraqurylymdyq damý mınıstri Beıbit Atamqulov Aqtóbe-Astrahan baǵytyndaǵy joldyń jaıyna toqtaldy.

«Aqtóbe-Atyraý-Astrahan baǵytyna erekshe nazar aýdarǵym keledi. Qaıta jańartý jumystary bastalǵanǵa deıin avtojoldyń nasharlyǵynan Aqtóbe men Atyraý, Aqtaý qalalary arasyndaǵy qatynas Oral qalasy arqyly júzege asyrylatyn. ıAǵnı, 500 shaqyrym artyq jol júretin. Qazir bul avtojoldyń boıynda qurylys jumystary qarqyndy júrgizilip jatyr. Bıyl Qandyaǵash-Maqat (327 shaqyrym) ýchaskesinde jumystardy aıaqtap, jolda qozǵalys ashylady. Al kelesi jyly tolyq paıdalanýǵa beremiz», - dedi mınıstr.

Onyń sózine qaraǵanda, bıyl Túrkistan, Jambyl oblystaryn ortalyq óńirlermen tikeleı baılanystyrý jumystary qarqyn alýy tıis.

«Bul óńirler men kórshi memleketter elimizdiń ortalyǵyna saparlaý úshin Almaty qalasy arqyly, 250 shaqyrym artyq jol júredi. Sondyqtan, Merki-Býrylbaıtal avtojolynyń áleýmettik mańyzy zor jáne ol Ortalyq Azııa elderimen tranzıtke áser etedi. Bıyl jolda negizgi jumystardy aıaqtap, qozǵalysty ashýdy (262 shaqyrym) josparlap otyrmyz», - deıdi Beıbit Atamqulov.

Eske salsaq, Indýstrııa jáne ınfraqurylymdyq damý mınıstri atalmysh sharada aldaǵy 5 jylda qansha jol salynatyny týraly málimet bergen bolatyn.

Sondaı-aq, bıyl Taldyqorǵan-Óskemen baǵytyndaǵy 768 shaqyrym jolda rekonstrýktsııalaý jumystary aıaqtalatyny belgili boldy.