Kandıdatty 10 teńge aıyrmashylyqqa bola tirkemeý ádiletsizdik - Jaqyp Asanov

ASTANA.QazAqparat - Kandıdatty deklaratsııadaǵy 10 teńge aıyrmashylyqqa bola tirkemeý ádiletsizdik. Mundaı pikirdi búgin elordada ótip jatqan QR Ortalyq saılaý komıssııasynyń 25 jyldyǵyna arnalǵan halyqaralyq konferentsııada QR Joǵarǵy sotynyń tóraǵasy Jaqyp Asanov bildirdi, dep habarlaıdy QazAqparat tilshisi.

«Sot júıesi saılaý týraly zańnamanyń buzylýyna qatysty kez kelgen naqty fakti boıynsha sheshim qabyldanatyn saty sanalady. Sondyqtan, eń aldymen saılaýǵa qatysty daýlar boıynsha ahýal qandaı ekendigin aıtpaqpyn. Zań mundaı shaǵymdardy qaraýǵa óte tyǵyz ýaqyt bekitken. Eger saılaýǵa daıyndyq júrip jatsa, onda sot 5 kúnniń ishinde qaraýy tıis. Biraq, daýys bergenge deıin bes kúnnen keshiktirilmeýi kerek. Eger daýys bergenge nemese saılaýshylardyń daýysyn sanaýǵa deıingi bes kúnniń ishinde túsetin bolsa, onda sot mundaı shaǵymdardy kúnbe-kún qaraýy qajet», - dedi Jaqyp Asanov.

Máselen, onyń dereginshe, 2016 jyly ótken Májilis pen Máslıhat saılaýlarynda sotqa 355 shaǵym túsken. Bul 2012 jyly ótken saılaýlardaǵy shaǵymdardan 25 paıyzǵa kem. Degenmen, 2016 jylǵy saılaýlardaǵy shaǵymdardyń 96 paıyzy kandıdattardyń deklaratsııalarynda kórsetilgen somada aıyrmashylyq bolýyna baılanysty tirkeýden bas tartýǵa kelispeýmen baılanysty bolǵan.

«Árıne, kandıdattyń tikeleı kinási bolmasa sot shaǵymdy qanaǵattandyrady. Aıtalyq, Ońtústik Qazaqstan oblystyq saılaý komıssııasy azamat Áıkendi oblystyq máslıhatqa qandıdat retinde tirkeýden bas tartty. Sot onyń sheshimin joıyp, kandıdatty tirketti. Óıtkeni, sot qaraýy barysynda salyq organdarynyń aqparaty dáleldenbedi. Saılaý komıssııalary deklaratsııadaǵy aıyrmashylyqqa baılanysty tirkeýden bas tartatyn derekter óte kóp. Árıne, áńgime mıllıondar nemese júzdegen myń teńge tóńireginde bolyp otyrǵan joq. Sóz 100, 10 teńge jaıynda. Mine osyndaı bolmashy ǵana soma. Degenmen, zań turǵysynan biz olardy qabyldamaýymyz kerek. Biz muny múldem ádiletsiz dep esepteımiz. Sondyqtan osy turǵyda zań normalaryn naqtylaý qajet», - dedi QR Joǵarǵy sotynyń tóraǵasy.

Osy rette QR Ortalyq saılaý komıssııasynyń tóraǵasy Berik Imashev mundaı jaǵdaılarda sot onyń durys ne burys ekendiginiń ara jigin ashyp berýge quqyly ekendigin atap ótti.

«Biz normalardaǵy formaldy talaptardy eskeremiz. Saılaý komıssııasy sáıkessizdikterge oraı sheshim shyǵarý kerek. Bizde túsindirý quqy berilmegen. Eger daýlardyń 96 paıyzy osy sanatqa jatatyn bolsa, onda saılaý komıssııalarynyń músheleri zań talaptaryn múltiksiz oryndaıdy degen sóz»,- dedi Berik Imashev.

Aıta keteıik, 2 kúndik halyqaralyq konferentsııa qatysýshylaryna Elbasy Nursultan Nazarbaev, QR Parlamenti Senatynyń tóraǵasy Qasym-Jomart Toqaev quttyqtaý joldaǵan bolatyn. 

Alqaly jıynǵa Ázerbaıjan, Reseı, Latvııa, Lıtva, Tájikstan, Grýzııa, Qyrǵyzstan syndy elderdiń Ortalyq saılaý komıssııalarynyń tóraǵalary qatysýda.

Konferentsııa aıasynda QR Ortalyq saýlaý komıssııasy men Ázerbaıjannyń Ortalyq saılaý komıssııasy jáne Iordanııanyń Táýelsiz saılaý komıssııasy arasynda ózara túsinistik týraly memorandýmǵa qol qoıylmaq.