Qandaı úıirmeler men sektsııalar tegin bolady

NUR-SULTAN. QazAqparat – QR Mádenıet jáne sport mınıstrligi Mádenıet komıteti tóraǵasynyń orynbasary Kúmis Seıitova balalarǵa arnalǵan qandaı úıirmeler men sektsııalar memlekettik tapsyryspen tólenetinin aıtyp berdi, dep habarlaıdy QazAqparat tilshisi.

«Shyǵarmashylyq úıirmelerdiń bekitilgen tiziminde 9 baǵyt boıynsha 59 úıirme bar. Olar – bı, beıneleý óneri, sándik-qoldanbaly shyǵarmashylyq, teatr jáne kıno, zamanaýı art-ındýstrııa, vokal, aspaptyq oryndaý, mýzeı isi jáne ádebı úıirmeler», - dedi spıker Ortalyq kommýnıkatsııalar qyzmetinde ótken baspasóz máslıhatynda.

Komıtet ókili ár óńirde shyǵarmashylyq úıirmeler jyl saıyn balalardyń qajettiligine jáne qyzmet kórsetýshiler múmkindigine baılanysty, kózdelgen nysanaly qarajat sheginde jumys isteıtinin aıtty.

«Birinshi kezekte platformada shyǵarmashylyq úıirmelerdiń jumysyn uıymdastyrýǵa daıyn qyzmet kórsetýshiler tizimi jasalýy tıis», - deıdi Kúmis Seıitova.

Buǵan deıin Mádenıet jáne sport vıtse-mınıstri E. Qojaǵapanov Qazaqstanda 82 myń bala úıirme men sport sektsııasyna tegin qatysa alatynyn aıtqan edi.

Balalar úıirmeleri men sport sektsııalaryn jan basyna qarjylandyrý úshin Artsport.edu.kz aqparattyq júıesi ázirlendi.