Qandastarǵa qoldaý kórsetetin biryńǵaı baılanys ortalyǵy ashylady
Bul týraly qor prezıdenti Nurtaı Ábiqaev aqyn, «Nur Otan» partııasy qabyldaý bóliminiń hatshysy Aýyt Muqıbekti qabyldaý barysynda habarlady.
«Daıarlanǵan jumys jospary aıasynda «Otandastar» qory janynan arnaıy baılanys ortalyǵyn ashpaqpyz. Onda qandastarymyz ózderin mazalaǵan barlyq suraqqa jaýap ala alady. Jobalyq basqarý tásili arqyly bul ortalyqta elge oralǵan jáne oralýǵa nıetti otandastarymyzǵa qajetti barlyq aqpar jınaqtalatyn bolady. Atalmysh bastama aldymen Astana men Almatyda, odan keıin elimizdiń basqa da aımaqtarynda uıymdastyrylady. Jobany júzege asyrý barysynda ortalyq memlekettik organdar, profıldik kompanııalar jáne uıymdarmen birigip jumys isteımiz degen oıdamyn», - dedi qor basshysy.
Kezdesý barysynda qor basshysy Nurtaı Ábiqaev Aýyt Muqıbekti 50 jas mereıtoıymen quttyqtap, óz Otanyn jáne halqyn súıetin ultjandy azamat retinde elimizdiń damýyna, táýelsizdiginiń nyǵaıýyna baǵyttalǵan is-sharalarǵa belsene qatysyp, qoldaý kórsetip júrgeni úshin arnaıy alǵys hatpen marapattady.
Qytaı jerinde dúnıege kelgen qazaq aqyny tarıhı otanyna 1998 jyly birjola qonys aýdarǵan. Sodan beri shet elderde turatyn qandastarymyzdyń qazaq topyraǵyna oralýyna, osy oraıda týyndaǵan qıyndyqtardyń ońtaıly sheshilýine atsalysyp júr. Qazaq kóshiniń janashyry retinde «Tuńǵysh Prezıdenttiń kóshi-qon qoryn» qurý máseleni 2011 jyldan beri kóterip keldi.
«Otandastar» sııaqty qor qurý máselesin biraz jyldan beri kóterip keldim. Sebebi otandastarǵa kómek kórsetetin mundaı qorlar Izraıl, Germanııa sııaqty álemniń birqatar alpaýyt memleketterinde bar. Elbasynyń tapsyrmasymen ol arman da, mine, oryndaldy. Kelem degen qazaqqa, Otanda qonystanyp qalam degen qazaqqa qazir bizde qıyndyq joq. Endi olardyń máselelerimen keshendi túrde aınalysatyn qordyń paıda bolǵanyna óz basym qýanyshtymyn», - dedi Aýyt Muqıbek.