Qandastar men memorgan ókilderiniń onlaın kezdesýinde ózekti máseleler qozǵaldy

NUR-SULTAN. QazAqparat - Búgin QR Aqparat jáne qoǵamdyq damý mınıstrliginiń bastamasymen «Otandastar» qory alańynda memlekettik organdar men qandastardyń arasynda onlaın-kezdesý ótti, dep habarlaıdy QazAqparat atalmysh qorǵa silteme jasap.

Qandastardyń suraqtaryna QR AQDM Etnosaralyq qatynastardy damytý komıteti, QR ІІM Kóshi-qon qyzmeti komıteti, QR EHÁQM Eńbek, áleýmettik qorǵaý jáne kóshi-qon komıteti, QR AShM Jer resýrstaryn basqarý komıteti, QR SІM Konsýldyq qyzmet departamenti jáne «Otandastar qory» KeAQ basshylyǵynyń ókilderi jaýap berdi.

Kezdesý barysynda kóshi-qon protsesi kezinde qujattardy rásimdeý, karantındik shekteýler kezeńinde olardyń shetelden Qazaqstanǵa kelý tártibi, vıza alý úshin shaqyrýǵa qoıylatyn talaptar, Qazaqstanǵa qonys aýdarǵysy keletin etnıkalyq qazaqtardyń ultyn aıqyndaý tártibi jáne t.b. sııaqty ózekti máseleler talqylandy.

Sonymen qatar, kezdesýge qatysýshylar shetelden qonys aýdarǵan etnıkalyq qazaqtardyń eńbek ótilin esepke alý, jeke sharýashylyq júrgizý maqsatynda aýyl sharýashylyǵy jerlerin jáne jaıylymdyq jerlerdi uzaq merzimge jalǵa alý jaıyn kóterdi.

Qandastar memlekettik organdardyń ókilderinen ózderin qyzyqtyrǵan barlyq suraqtarǵa jaýap aldy.