Qandastar men qonys aýdarýshylardy qabyldaıtyn óńirler tizbesi qaıta qaralady

ASTANA. QazAqparat – Qandastar men qonys aýdarýshylardy qabyldaıtyn óńirlerdiń tizbesi qaıta qaralady. Mundaı bastamany ashyq talqyǵa shyǵarylǵan Aýyldardy damytýdyń 2023-2027 jyldarǵa arnalǵan tujyrymdama-jobasynda Ulttyq ekonomıka mınıstrligi kótergen, dep habarlaıdy QazAqparat tilshisi.

«Qandastar men qonys aýdarýshylardy qabyldaıtyn óńirlerdiń tizbesi qaıta qaralady. Atap aıtqanda, halyq sany kóp aımaqtardan eńbek kúshi tapshy bolyp otyrǵan shekara mańyndaǵy aýmaqtarǵa kóshirý qarastyrylady. Ol kóshi-qon saıasatyn tıimdi iske asyrý úshin qajet. Bul rette qonystandyrý aımaqtarynan Aqmola, Atyraý, Batys Qazaqstan oblystarynyń alynyp tastalǵany eskeriledi», - dep jazylǵan Ashyq NQA portalynda jarııalanǵan tujyrymdamada.

Eske salaıyq, buǵan deıin elimizdiń 7 shekaralas óńirindegi aýyldardyń halyq sany azaıyp bara jatqanyn jazyp edik. Halyqtyń údere kóshýine tabystyń tómendigi, jumyssyzdyq, jol jáne ınjenerlik ınfraqurylymnyń tozýy sebep bolyp otyr.

Qosa ketsek, shekara mańyndaǵy klımaty qatal aýyl turǵyndarynyń 1 jyldyq eńbek ótili 1,5 jyl bolyp eseptelmek.

Budan bólek, tabıǵı-klımattyq jaǵdaıy kúrdeli shekara mańyndaǵy eldi mekender úshin elektr energııasyna tómendetilgen tarıf belgilenedi. Osyndaı aýyldarda kásipkerlikti qoldaý úshin bıýdjet qarajaty esebinen mıkrokredıt pen jobalarǵa kepildik berýge kvota bólý de josparlanǵan.