Qandastar 4,2 mln teńgelik baspana sertıfıkatyn qalaı rásimdeıdi
Buıryqta jergilikti jumyspen qamtý mekemeleri ár jyldyń 15 jeltoqsanyna deıin qandastar men ishki mıgranttardy erikti túrde qonystandyrýǵa jatatyn eldi mekenderdiń tizbesin usynyp otyrý kerektigi aıtylǵan.
«Serpin» jáne «Jarqyn Bolashaq» túlekteri men qandastar Qazaqstannyń ishinde eńbek kúshi tapshy óńirlerge buǵan deıin turǵan óńirine qaramastan kóshe alatyny, kóship barǵan aýdanynda memlekettik qoldaý alatyny da aıtylǵan.
Ol memlekettik qoldaýdy alýǵa buıryq kúshine engenge deıingi 6 aıdyń kóleminde eńbek kúshi tapshy óńirlerge qonys aýdarǵan adamdar ótinish bere alady. Eńbek mobıldiligi ortalyqtary sol ótinish negizinde jumys berýshiniń shotyna áleýmettik kelisimshart jasalǵannan keıingi 3 kúnniń ishinde aqshalaı tólem aýdarady.
Ekonomıkalyq utqyrlyq sertıfıkaty baspana satyp alýǵa jáne salýǵa, ıpoteka rásimdegen jaǵdaıda alǵashqy jarna retinde materıaldyq kómek berýdi kózdeıdi. Bul sertıfıkat tutas otbasyǵa nemese ajyrasqanyna keminde 3 jyl bolǵan azamattarǵa beriledi. Onyń kólemi satyp alynatyn baspana baǵasynyń 50%-ynan aspaýy kerek. Biraq bul soma 1 160 aılyq eseptik kórsetkishten (4 282 720 teńge – red) kóp bolmaýy kerek.
Bul sertıfıkatty qonys aýdarýshy jaqyn týystarynan baspana satyp alýǵa paıdalana almaıdy. Al jaqyn týystarǵa ata-ana, bala, asyrap alýshy, asyrap alynǵandar, ata-anasy bir jáne ata-anasy bólek aǵaly-iniler men apaly-sińliler (aǵa-qaryndastar), ata, áje, nemereler jatatyny aıtylǵan.
Osyndaı sertıfıkat arqyly satyp alynǵan úıdi qonys aýdarýshy 5 jyl kóleminde satyp kete almaıdy.
5 jyldyń ishinde qonys aýdarýshy basqa óńirge kóship ketse, sertıfıkat aıasynda alǵan materıaldyq kómekti memleketke qaıtarady. Eńbek mobıldiligi ortalyqtary jibergen eskertýge qonys aýdarýshy 15 kúnniń ishinde jaýap qatpasa, is sotqa joldanady.
Bul buıryq 14 maýsymda kúshine enedi.