Qandasymyz karateden qara belbeýdiń úshinshi dan dárejesin qorǵady - sheteldegi qazaq baspasózi
Qoı terisine salynǵan kóshpendilerdiń estelikteri - «Halyq gazeti»
Jeksenáli Qudaıbergenuly - teri sýretshisi, 1992 jyly Shyńjańnyń Kúnes aýdanynda dúnıege kelgen. 2016 jyly Shyńjań pedagogıkalyq ýnıversıtetiniń Beıneleý óneri akademııasyn «beıneleý óneri» mamandyǵy boıynsha bitirdi. Onyń «jartastaǵy keskindeme», «Altyn kúz», «Kóktem», «Qoı terisindegi sýret, jylqy áýlıesi» jáne t.b. eńbekteri bar.
Bul týraly qytaılyq «Halyq gazeti» basylymy habarlaıdy.
Sýretshi Jeksenáli Qudaıbergenulynyń aıtýynsha, qazaqtar kóshpeli halyq bolǵandyqtan teridegi sýretter ónerdi ǵana emes, kóshpendilerdiń shynaıy ómirin eske túsiredi.
«Tarıhı turǵydan qazaqtar kóshpeli halyq bolǵan. Keń dalada taý asyp, tas basyp, sýdyń tunyǵyn, shóptiń sonysyn izdedi. Mundaı kóshpeli ómirdiń óshirýge bolmaıtyn estelikteri tym kóp. Olar jaılaýdan jaılaýǵa kóship, myńǵyrtyp malyn aıdaǵan sátteriniń ózi shyǵarmashylyq shabyttyń qaınar kózi. Teridegi sýretter ónerdi ǵana emes, kóshpendilerdiń shynaıy ómirin eske túsiredi», - deıdi sýretshi Jeksenáli Qudaıbergenuly.
Ózbekstan men Qazaqstan janýarlar dúnıesin birlesip qorǵaıdy - «ÓzA»
Samarqand qalasynda ótken «Jabaıy janýarlardyń qonys aýdaratyn túrlerin saqtaý» (CMSCOP14) Konventsııasyna qatysýshylar konferentsııasynyń 14-shi otyrysy aıasynda Ózbekstan men Qazaqstan Ústirt jazyǵynyń faýnasyn saqtaý boıynsha yntymaqtastyq týraly memorandýmǵa qol qoıdy, - dep habarlaıdy «ÓzA» aqparat agenttigi.
Atalǵan basylymnyń dereginshe, memorandýmǵa ÓR Ekologııa, qorshaǵan ortany qorǵaý jáne klımattyń ózgerýi mınıstri Azız Abdýhakımov pen QR Ekologııa jáne tabıǵı resýrstar vıtse-mınıstri Nurken Sharbıev qol qoıǵan.
Qujat Ortalyq Azııa elderiniń 2023 jyly Dúnıejúzilik tabıǵı mura nysandarynyń tizimine engizilgen «Turan qońyrjaı shólder» Transulttyq Dúnıejúzilik tabıǵı mura obektisin saqtaý jónindegi mindetin oryndaýǵa qyzmet etedi.
Qandasymyz karateden qara belbeýdiń úshinshi dan dárejesin qorǵady - Janadauir.com
Jerlesimiz Serikbol Sezhanuly Indonezııada karateden qara belbeýdiń úshinshi dan ataǵyn abyroımen qorǵap keldi, - dep habarlaıdy mońǵolııalyq «Janadauir» basylymy.
Atalǵan BAQ-tyń dereginshe, Mońǵolııada Karate Shınkıokýshınkaı myqty damyp kele jatqan jekpe-jek óneriniń biri. Serikbol Sezhanuly osy jekpe-jek ónerin Baıan-Ólgeı aımaǵynda, tipti Mońǵolııada damytyp, jastarǵa úıretip júrgen karate sheberiniń biri. Ol eń alǵash osy jekpe-jek ónerin Qazaqstan elinen úırenip kelip, Baıan-Ólgeı aımaǵynda 2013 jyldan bastap klýb ashyp damyta bastaǵan. Serikbol búginge deıin Mońǵolııanyń Karate Shınkıokýshınkaı federatsııamen birigip, atalǵan aımaqta jattyqtyrýshy bolyp jumys istep keledi eken.
«Janadauir» basylymy osy aptada Baıan-Ólgeı aımaǵynyń «Tarlan» klýbynyń jetekshisi, Halyqaralyq dárejedegi sport sheberi, Qara belbeýdiń 3-shi dan ıegeri Serikbol Sezhanulymen suhbattasqan eken.
Ol bul suhbatynda Mońǵolııa elinen 2 adam Indonezııa eline Azııa Karate semınaryna qatysyp, sonda ótken dan test, ıaǵnı masterlar arasynda qara belbeý qorǵaý sharasyna barǵanyn aıtady.
Atap aıtqanda, S. Sezhanuly 2024 jyly Qańtar aıynyń 26-28-i aralyǵynda Indonezııa eliniń Batý qalasy Malang demalys jerinde 2024 jylǵy Azııa Karate semınaryna jerlesi Móngónshagaı ekeýi Mońǵol eli atynan abyroımen qatysyp, karateden 3-shi dan dárejesin qorǵaǵanyn tilge tıek etken. Karateıst bul suhbatynda tilshiniń basqa da birneshe suraqtaryna jaýap bergen.
Sondaı-aq osy aptada «Jańa dáýir» saıtynda «Aımaǵymyzdaǵy taekvonda sportyn damytqan jattyqtyrýshy» degen taqyryptaǵy suhbat jaryq kórdi.
Atalǵan basylymnyń málimetinshe, 2023 jyldyń sońynda úzdikterdi qortyndylaýda jyldyń tańdaýly jattyqtyrýshysy ataǵy Baıan-Ólgeı aımaqtyq sport basqarmasynyń taekvonda salasynyń jattyqtyrýshysy Erulan Shólenulyna buıyrǵan. Erulan aımaqtyq sport sonyń ishinde taekvonda salasyna qomaqty úles qosqan.
Onyń shákirtteri qazirgi tańda ulttyq taekvonda quramynda halyqaralyq dárejede óner kórsetip júr eken.
«Jańa dáýir» saıtynyń suhbat aıdaryna qara belbeý tórtinshi dan, halyqaralyq sport sheberi Erulan Shólenulyn shaqyryp, suhbat alǵan.
Qazaqstan men Ózbekstan 2023 jyly álemde altyndy eń kóp satqan elder boldy - «Parstoday»
Ótken jyly álemde altynnyń negizgi satýshysy 50 tonnaǵa jýyq altyn satqan Qazaqstannyń Ortalyq banki boldy. Ózbekstannyń taza altyn saýdasy shamamen 25 tonnany qurady jáne ol álemdegi altyn satatyn ekinshi el.
Bul týraly osy aptada Irannyń «Parstoday» aqparat agenttigi habarlaıdy.
Atalǵan aqparat agenttiginiń habarlaýynsha, Dúnıejúzilik altyn keńesi (WGC) 2023 jyldyń qorytyndysy boıynsha altyn satý kólemi boıynsha Ózbekstan ekinshi oryndy jeńip aldy jáne birinshi oryndy Qazaqstanǵa bergen.
«2023 jyly Qytaı 230 tonna altyn satyp alyp, álem elderi arasynda birinshi orynǵa shyqty. Odan keıin Polsha, Sıngapýr, Lıvııa jáne Chehııa. Jeltoqsanda álemdik ortalyq bankterdiń altyn-valıýta qory 28 tonnaǵa ósti, bul baǵaly metaldardy satyp alý úderisiniń jalǵasýyn bildiredi. Túrkııa 18 tonna altynmen negizgi satyp alýshy boldy», - dep jazdy ırandyq BAQ.
Ózbekstan turǵyndarynda qansha jeńil kóligi bar ekeni belgili boldy - Uza.uz
Ózbekstandyq Statıstıka agenttiginiń habarlaýynsha, 2024 jyldyń 1 qańtaryndaǵy jaǵdaı boıynsha Ózbekstanda jeke tulǵalardyń menshigindegi avtokólikter sany 4 020 744 bolǵan. Bul san eki jyl buryn 3 268 470 edi. Ózbekstan halqynyń keıingi eki jylda kólik sany 700 myńǵa kóbeıgen.
Bul týraly osy aptada «Uza.uz» aqparattyq agenttigi habarlady.
Atalǵan BAQ-ta turǵyndardyń menshigindegi avtokólikterdiń jalpy sany sany da jarııalanǵan. Atap aıtqanda, jeńil avtokólikter – 3 759 045, júk kólikteri – 240 917, avtobýstar – 6 297, shaǵyn avtobýstar – 9102, arnaıy kólikter – 5 383.
Sondaı-aq osy aptada ózbekstandyq «Uza.uz» basylymynda, «Ózbekstanda jolaýshylar avtobýstaryn áıelderdiń júrgizýine ruqsat berlidi» degen taqyryptaǵy aqparat jarııalandy.
Basylymnyń málimetinshe, Ózbekstanda áıelder avtobýs júrgizý quqyǵyna ıe bolǵan. Mınıstrler Kabınetiniń 2024 jylǵy 12 aqpandaǵy tıisti sheshimine sáıkes Úkimettiń 2018 jylǵy 31 mamyrdaǵy 408 qaýlysynyń 2-qosymshasynyń 27-tarmaǵynyń jáne 3-qosymshanyń 5-tarmaǵynyń kúshi joıylǵan.
Ózbekstandyq BAQ-tyń dereginshe, joǵarydaǵy normalarda áıelderdi «VS» jáne «D» sanattary boıynsha oqytýdy uıymdastyrý kezinde júk kólikteriniń júk kótergishtigi 2,5 tonnadan, al jolaýshylardy tasymaldaýǵa ruqsat etilgen avtobýstardyń sany 14 adamnan aspaýy kerektigi belgilengen bolatyn.
Endi áıelderdiń júk kóterimdiligi 2,5 tonnadan asatyn júk kólikterin júrgizý jáne 14-ten astam jolaýshysy bar avtobýstardy júrgizý boıynsha jumys isteýine quqyqtyq negiz jasalǵan.
Stambýlǵa byltyr kelgen sheteldik qonaqtar sany rekordqa jetti - TRT
Adam eń kóp keletin qalalardyń kósh basynda turatyn Stambýlǵa byltyr 17 mıllıon 370 myń 30 sheteldik qonaq keldi. Bul – rekord, - dep habarlady Túrkııa Radıo Televızııa portaly.
Atalǵan BAQ-tyń dereginshe, Mádenıet jáne týrızm mınıstrliginiń derekterine qaraǵanda, Stambýlǵa kelgen sheteldik qonaq sany aldynǵy jylmen salystyrǵanda 8,44 paıyz artqan. Byltyr 17 mıllıon 370 myń 30 sheteldik qonaqty kútip alǵan Stambýlda eń kóp týrısti Reseı Federatsııasy jibergen. Atap aıtqanda, Reseıden Stambýlǵa 1 mıllıon 990 myń 226 adam kelgen.
«Germanııadan 1 mıllıon 286 myń 504 adam, Irannan 1 mıllıon 53 myń 638 adam, Amerıka Qurama Shtattarynan 853 myń 766 týrıst keledi. Besinshi orynda Ulybrıtanııa, altynshy orynda Saýd Arabııasy jáne jetinshi orynda Frantsııa tur», - dep jazady «TRT».