Qandas mártebesin elektrondy formatta tegin alýǵa bolady

NUR-SULTAN. QazAqparat - Qazaqstan Respýblıkasynyń aýmaǵyna buryn turǵan jáne qaıta kelgen etnıkalyq qazaqtar eGov.kz portalynda qandas mártebesin alýǵa nemese ony uzartýǵa ótinim bere alady, dep habarlaıdy QazAqparat.

Endi eGov.kz portalynda paıdalanýshy ózine, sondaı-aq otbasynyń barlyq múshelerine atalǵan qyzmetke onlaın tapsyrys bere alady. Qyzmet jeke tulǵalarǵa tegin kórsetiledi. Paıdalanýshylarǵa qoıylatyn mindetti talaptar - JSN jáne ETsQ bolýy.

Bul jańartýlar QR Prezıdentin bıýrokratııasyzdandyrý týraly Jarlyǵy aıasynda júzege asyryldy. Jarǵynyń negizgi máni - tsıfrlyq transformatsııa jáne memlekettik basqarýdyń barlyq salalarynyń júıeli reınjınırıngi bolyp tabylady.

«Biz memlekettik qyzmetterdi onlaın formatqa kóshirý boıynsha belsendi jumys júrgizip jatyrmyz. Buryn atalǵan qyzmet HQKO men jergilikti atqarýshy organdar arqyly offlaın túrinde kórsetilgenin atap ótkim keledi. Endi HQKO barmaı aq, qyzmetti eGov.kz elektrondyq úkimet portaly arqyly onlaın alýǵa bolady. Bul qyzmettiń azamattar úshin mańyzdylyǵyn túsine otyryp, biz qyzmetti alý protsesin jeńildettik», - dep atap ótti «Ulttyq aqparattyq tehnologııalar» AQ Basqarma tóraǵasy Rostıslav Konıashkın .

Qyzmetti qoldaný úshin paıdalanýshy «Elektrondyq úkimet» (eGov.kz) portalynda qajetti qyzmet túrin tańdaıdy: qandas mártebesin berý nemese uzartý. Tańdalǵan qyzmet túrine sáıkes paıdalanýshy mártebesin alý úshin QR Eńbek jáne halyqty áleýmettik qorǵaý mınıstrligi aqparattyq júıesi arqyly tekserý júzege asyrylatyn bolady.

Barlyq mindetti joldardy toltyryp, suratylǵan qujattardy qosa tirkeý qajet (faıldar pdf nemese jpg formatynda).

Sondaı-aq ótinim bergen kezde paıdalanýshy qandas mártebesin berý nemese uzartý qajet otbasy músheleri boıynsha málimetterdi toltyra alady. Otbasy músheleriniń sanyna shekteý joq. Budan ári qol qoıýdyń qoljetimdi ádisteriniń birimen ótinimge qol qoıý qajet.

Qyzmet kórsetý nátıjesi - qandas kýáligi, jergilikti atqarýshy organnyń qandas mártebesin uzartý týraly sheshimi ne elektrondyq qujat nysanynda paıdalanýshynyń «jeke kabınetine» jiberilgen memlekettik qyzmet kórsetýden dáleldi bas tartý bolyp tabylady. Memlekettik qyzmetti kórsetý merzimi - 4 jumys kúni ishinde.

Sondaı-aq qyzmet kórsetý qorytyndysy boıynsha qandas kýáligi egov.kz portalynyń «Tsıfrlyq qujattar» bóliminde jáne Egov Mobile qosymshasynda paıda bolady.

Qyzmet sondaı-aq Nur-Sultan, Almaty jáne Shymkent qalalarynyń, aýdandardyń jáne oblystyq mańyzy bar qalalardyń HQKO-nyń jáne jergilikti atqarýshy organdarynda kórsetiledi.