Qandas mártebesin «bir tereze» qaǵıdaty boıynsha alýǵa bolady
Eńbek jáne halyqty áleýmettik qorǵaý mınıstrliginiń málimetinshe, jańa tetik birqatar memleketterde pılottyq rejımde iske asyrylýda. Bul elimizge kelý, jumys orny, turǵyn úı berý múmkindikteri týraly máselelerdi sheshýge jáne respýblıka aýmaǵyna kirmeı-aq qandas mártebesin alýǵa múmkindik beredi.
Jańa tártip pen basqa da birqatar sharalar Memleket basshysy 2023 jyldyń 19 sáýirinde qol qoıǵan «Qazaqstan Respýblıkasynyń keıbir zańnamalyq aktilerine Qazaqstan Respýblıkasyndaǵy ákimshilik reforma máseleleri boıynsha ózgerister men tolyqtyrýlar engizý týraly» zań sheńberinde bekitildi.
Qazirgi ýaqytta etnıkalyq qazaqtardan ótinishterdi qabyldaý boıynsha jumys vızalyq rejım elderinde (Túrikmenstan, Mońǵolııa, Qytaı, Iran, Aýǵanstan) ornalasqan QR Syrtqy ister mınıstrliginiń shet elderdegi mekemelerinde pılottyq rejımde júrgizilýde. Keıinirek elshilikter arqyly ótinimderdi qabyldaý vızasyz rejımi bar elderde de júrgiziletin bolady.
Budan basqa, Enbek.kz portaly arqyly osy pılottyq jobany (qandas mártebesin berý jáne qandastardy qabyldaýdyń óńirlik kvotasyna engizý jónindegi qyzmetter) iske asyrý sheńberinde memlekettik qyzmetter kórsetý kezinde memlekettik organdardyń ózara is-qımyl algorıtmi engizildi.
Búgingi tańda Qazaqstan Respýblıkasynyń shet elderdegi mekemeleri arqyly shetelde turatyn etnıkalyq qazaqtardan 771 (237 otbasy) ótinish qabyldandy.
Sondaı-aq, Memleket basshysynyń tapsyrmasyn iske asyrý sheńberinde Mańǵystaýda oblys ákiminiń orynbasarynyń basshylyǵymen qandastardy jaıǵastyrý jáne qabyldaý jónindegi arnaıy komıssııa quryldy, ol etnıkalyq qazaqtardyń óńirde turýǵa ótinishterin derbes qaraıdy.
Turaqty negizde jumys isteıtin osyndaı komıssııalar aldaǵy ýaqytta elimizdiń barlyq óńirlerinde qurylatyn bolady.
Esterińizge sala keteıik, QR Áleýmettik kodeksi jáne QR 2022-2027 jyldarǵa arnalǵan kóshi-qon saıasatynyń jańa tujyrymdamasy aıasynda etnıkalyq kóshi-qondy damytý jáne qoldaý boıynsha jańa zańnamalyq bastamalar engizildi.
Etnıkalyq qazaqtar (basqa elderdiń azamattary) úshin alǵash ret «Ata joly» kartasy engiziledi, onyń ishinde, joǵary deńgeıdegi kásibı mamandar nemese tabysty bıznesmenderge elge ońaılatylǵan kirý múmkindigi qarastyrylǵan.
Sonymen qatar erikti qonys aýdarýdyń tıimdiligin arttyrý maqsatynda azamattardy soltústik óńirlerge qonys aýdarýǵa qatysatyn jumys berýshilerdi qoldaý boıynsha ınstıtýtsıonaldyq sharalar qabyldandy. Turǵyn úı satyp alý, salý úshin nemese ıpotekalyq turǵyn úı qaryzdary boıynsha bastapqy jarnanyń bir bóligin jabý úshin ekonomıkalyq utqyrlyq sertıfıkaty turǵyn úı qunynyń 50%-y nemese bir otbasyna 4 mln teńgege deıin mólsherinde birjolǵy óteýsiz jáne qaıtarymsyz negizde engizildi.