«Qandas» mártebesin alýǵa úmitkerlerdiń qujattarynda ulty týraly jalǵan málimet berý faktileri bar

NUR-SULTAN. QazAqparat – «Qandas» mártebesin alýǵa úmitker adamdardyń óz qujattarynda ulty týraly jalǵan málimet berý faktileri bar. Bul jaıynda Májilis depýtattarynyń saýalyna QR Premer-Mınıstri Asqar Mamınniń jaýabynda aıtylǵan, dep habarlaıdy QazAqparat tilshisi.

«Keıbir elderde (mysaly, Aýǵanstan, Iran, Irak, Pákistan) berilgen pasporttarda jáne jeke basty kýálandyratyn basqa qujattarda azamattyń ulty kórsetilmeıtinine baılanysty jeke etnıkalyq qazaqtar ózderiniń qazaq ultyna qatystylyǵyn dáleldeýde problemaǵa tap bolady. «Qandas» mártebesin alýǵa úmitker adamdardyń óz qujattarynda ulty týraly jalǵan málimet berý faktileri bar», - dedi Úkimet basshysy.

Onyń aıtýynsha, atalǵan máseleni retteý úshin Eńbek jáne halyqty áleýmettik qorǵaý mınıstrligi «Halyqtyń kóshi-qony týraly» Zańǵa: kóshi-qon máselesi boıynsha ýákiletti organnyń jeke basty kýálandyratyn qujattarda tıisti jazbalar bolmaǵan jaǵdaıda «qandas» mártebesin alýǵa úmitker adamdardyń qazaq ultyna qatystylyǵyn anyqtaý qaǵıdalaryn ázirleýge jáne bekitýge; respýblıkalyq mańyzy bar oblystardyń, qalalardyń, astananyń jergilikti atqarýshy organdarynyń jeke basty kýálandyratyn qujattarda tıisti jazbalar bolmaǵan jaǵdaıda «qandas» mártebesin alýǵa úmitker adamdardyń qazaq ultyna qatystylyǵyn anyqtaý týraly sheshim qabyldaý quzyretterin kózdeıtin túzetýlerdi pysyqtaýda.

«Úkimettiń zań shyǵarý qyzmeti aıasynda tıisti jumys júzege asyrylýda», - dedi Asqar Mamın.