Qandalany ýlaımyn dep kórshiniń balalaryn óltirip alǵan Aqtaý turǵyny sottaldy

<p>AQTAÝ. KAZINFORM &mdash; Aqtaý qalasynda páterin qandaladan ýlaımyn dep abaısyzda kórshilerin óltirip alǵan adamǵa sot úkimi shyqty. 48 jastaǵy qala turǵynyna 5 jylǵa bas bostandyǵynan aıyrý jazasy taǵaıyndaldy.&nbsp;</p>

Turǵyn sanıtarlyq qaǵıdany buzyp, abaısyzda eki kishkentaı balanyń ólimine ákelip soqqan is-áreketi úshin kináli dep tanylǵan.

Ol jarnama arqyly jándikterdi joıýǵa arnalǵan ýlaǵysh zattardy satyp alyp, páterindegi qandalany joıý maqsatynda qoldanǵan.

Alaıda bul áreketin kórshilerine eskertpegen.

Ýlaǵysh zattan ammıak pen karboksıgemoglabınder bólinip, odan joǵarǵy qabattaǵy basqa páterdiń 7 turǵyny ýlandy.

Onyń ishinde eki kishkentaı bala qaıtys bolǵan edi. 

Sotta 48 jastaǵy turǵynnyń kinási hımııa-toksıkologııalyq saraptama qorytyndysymen, kýálardyń jaýaptarymen, aıǵaq zattardy qarap-tekserý hattamasymen dáleldengen.

— Sot kúdiktini QR Qylmystyq kodeksiniń 304-baby 3-bóligi boıynsha kináli dep tanyp, 5 jylǵa bas bostandyǵynan aıyrý jóninde sheshim qabyldady. Jazasyn Qylmystyq kodekstiń 46-baby 5-bóligi 1-tarmaǵyna sáıkes qylmystyq atqarý júıesi barynsha tómen mekemede óteý belgilensin. Bultartpaý sharasy retinde qoldanylǵan úıqamaq alynsyn. Jazany óteý merzimi úkim jarııalanǵan kúnnen, ıaǵnı 18 qańtardan bastap esepteledi, - dedi Aqtaý qalalyq sotynyń sýdıasy Aqmaral Hasenova.