Qanat Turdıev: Turǵyndar qoǵamdyq orynda maska taǵýdy qoıdy

ÓSKEMEN. QazAqparat – Shyǵys Qazaqstan oblysynyń koronavırýs ınfektsııasyna baılanysty qazirgi epıdemıologııalyq jaǵdaıynyń qandaı ekendigin ShQO sanıtarlyq-epıdemıologııalyq baqylaý departamentiniń basshysy Qanat Turdıev aıtyp berdi, dep habarlaıdy QazAqparat tilshisi.

Epıdemıologııalyq jaǵdaıdy baǵalaýdyń respýblıkalyq matrıtsasyna sáıkes, oblys 24 shilde «qyzyl» aımaqqa engen.

COVID-19 pandemııasy bastalǵaly beri óńirde 33 224 naýqas tirkeldi. Onyń 24369-ynda aýrý belgileri bolsa, qalǵandary indetti jeńil ótkergen.

«Sońǵy táýlikte koronavırýs juqtyrǵan 261 jaǵdaı tirkelip otyr. Vırýsqa shaldyqqandar sany boıynsha Semeı men Óskemen qalalary aldyńǵy orynda. Semeıde pandemııa kezinde barlyǵy 9808 adam COVID-19 ınfektsııasyn juqtyrdy. Al Óskemende jalpy naýqastar sany 10163 adamdy qurasa, sońǵy táýlikte 83 turǵyn qaýipti dertke shaldyqqan», - dedi Qanat Turdıev.

Onyń aıtýynsha, qazirgi ýaqytta vırýs jyldam tarap barady. Munyń basty sebebi – óńir aýmaǵyna syrttan koronavırýstyń «delta» shtamynyń kelýi.

«Bul shtamm tez taraǵysh ári adamǵa aýyr áserin tıgizedi. Sondaı-aq ol 60 jastan asqan qarttarǵa ǵana emes, jastar arasynda da jyldam tarap jatyr. Budan bólek, keı azamattardyń karantın talaptaryn múldem elemeı, saqtyq sharalaryna nemquraıly qaraıtyny vırýs juqtyrǵandardyń kóbeıýine ákelip soǵýda. Turǵyndar qoǵamdyq orynda maska taǵýdy múldem qoıdy deýge de bolady. Jeke turǵyn úılerde halyq kóp jınalatyn toı-tomalaq, týǵan kún keshteri de jıi ótkizilip ketti», - deıdi ShQO sanıtarlyq-epıdemıologııalyq baqylaý departamentiniń basshysy.