Qanat Sharlapaev ýtılalym mólsheri týraly: Kórshilerimizden qalyp qoıdyq

<p>ASTANA. KAZINFORM &ndash; Ónerkásip jáne qurylys mınıstri Qanat Sharlapaev Úkimet otyrysynan keıin ótken baspasóz máslıhatynda Reseıde ýtılalym mólsheriniń qymbattaýy Qazaqstandaǵy naryqqa qalaı áser etetinin aıtty.</p>

«Men kórshi elderdiń ýtılalym máselesinde qandaı tásil qoldanatynyn nazar aýdaryp kórińizdershi. Olar ýtılalymdy alyp tastaýdy qoıyp, qunyn kóterip jatyr. Qyrǵyz respýblıkasy Chevrolet Cobalt jáne Onix óndiretin jelini iske qosqan eken. Endi olar da ýtılalym engizbekshi. Bul jerde túsiný kerek, Qazaqstan ýtılalym men alǵashqy tirkeý mólsheri boıynsha mańaıymyzdaǵy kórshi elderden qalyp qoıdyq», - dedi mınıstr.

Reseıdegi ýtılalymnyń qymbattaýy bizdegi baǵaǵa áser etpeıdi dep oılaıtynyn aıtty.

«Baǵanyń aıyrmashylyǵynan bizde taǵy eski kólikter qaptaýy múmkin. Onyń áseri ekologııaǵa, joldaǵy qaýipsizdikke tıedi. Shynymen ondaı táýekel bar. Reseıden bizge avtoqoqys aǵylsa, qazaqstandyqtarǵa jolda júrý qaýipti bola túsedi», - dedi Qanat Sharlapaev.