Qanat Sharlapaev qandaı paıdaly qazbalar boıynsha geologııalyq barlaý júrgizý qajettigin aıtty
- Elimizdiń mıneraldyq-shıkizat bazasynda 987 qatty paıdaly qazbalardyń ken orny esepke alynǵan. Sońǵy 30 jylda temir, marganets, altyn, ýran, munaı jáne gaz qorlarynyń ósýi baıqalady. Mysaly, altyn boıynsha qorlardyń tolý koeffıtsıenti 1,2-ni quraıdy. Bul degenimiz - óndirilgen bir tonna altynnyń ornyna bir de eki tonna altyn qory tolyǵyp jatyr. Al mys, myrysh, qorǵasyn jáne alıýmınıı qorlary boıynsha tereńdetilgen geologııalyq barlaý jumystaryn júrgizý qajet. Máselen, mys boıynsha qorlardyń tolý koeffıtsıenti – 0,7. Sonymen birge, mystyń perspektıvaly ýchaskeleri belsendi túrde barlanýda, - dedi mınıstr.
Onyń atap ótýinshe, geologııa jáne jer qoınaýyn paıdalaný salalarynyń ashyqtyǵyn qamtamasyz etý úshin zańnamalyq jáne ınstıtýtsıonaldyq reformalar júrgizilip, 2018 jyly jańa kodeks qabyldandy. Reforma aıasynda elimizdiń barlyq aýmaǵyna geologııalyq barlaý júrgizý múmkindigi ashyldy. Geologııalyq barlaý lıtsenzııasyn ótinimdi birinshi bolyp engizgen ınvestorǵa berý tártibi engizildi. 2018 jyldan beri 2 906 barlaý lıtsenzııasy jáne 111 óndirý lıtsenzııasy berildi.
- Jer qoınaýyn paıdalaný quqyǵy 1991 jylmen salystyrǵanda 2023 jyly 6 alty ese kóp berildi. Osylaısha, geologııa salasyna 1 mlrd dollar jeke ınvestıtsııalar tartyldy. Sonymen qatar, osy jyldyń 1 qańtarynda qatty paıdaly qazbalar qorlaryn CRIRSCO halyqaralyq júıesine saı KazRC standartyna kóshirý júzege asyryldy. Bıyl 11 aıda 58 qatty paıdaly qazbalar ken orny boıynsha KazRC standartyna sáıkes geologııalyq esepter qabyldandy, - dedi Qanat Sharlapaev.