Qanat Mýsın jýrnalısterdiń sot protsesterin jarııa etýine tyıym salý týraly pikir bildirdi

NUR-SULTAN. QazAqparat – QR Joǵarǵy sotynyń ákimshilik ister jónindegi sot alqasynyń tóraǵasy Qanat Mýsın «Habar» telearnasyndaǵy «Ult múddesi» baǵdarlamasynda jýrnalısterdiń sot protsesterin jarııa etýine tyıym salynatyny týraly aqparatqa túsinikteme berdi, dep habarlaıdy QazAqparat tilshisi.

«Men bul usynys týraly BAQ-tan bildim. Túzetýdi qaıtaryp alý durys sheshim boldy. Birdeńe aıtýǵa tyıym salý - bul máseleniń sheshimi emes. Árıne, sýdıa BAQ jarııalanymdaryna, jelidegi pikirlerge qaraılamaýy kerek. Eń bastysy, faktilerdi, sotta bolyp jatqan oqıǵalardy ár jýrnalıst úshin ár túrli berýi múmkin. Biraq olar da burmalaýǵa boı aldyrmaýy kerek. Eger faktiler burmalanyp, munyń bári sýdıanyń birjaqtylyǵy retinde sıpattalsa, ádil sheshim kútken azamattar úshin bul óte jaman. Sottyń ádil bolǵanyn qalasaq, ony kópshiliktiń aldynda ádiletsiz etip kórsetýden aýlaq bolý kerek», - dep túsindirdi ol.

Sondaı-aq, ol blogerlerdiń sot protsesine yqpal etý múmkindigi týraly pikir bildirdi.

«Bul da - kúrdeli másele. Bul jerde advokattyń kózqarasy boıynsha burmalaný bar ma degen suraqqa jaýap izdeý kerek. Bul qasaqana burmalaý nemese adam túsinetin dálelderdi sýbektıvti qabyldaý. Bolýy da múmkin. Sondyqtan másele óte kúrdeli. Biraq ol úshin blogerdi jazalaý artyq dep oılaımyn. Aqparattyń aq-qarasyn qoǵam ózi anyqtaýy kerek. Al qoǵamnyń pikiri eskerilmeı, blogerdi jazaǵa súıreý kerisinshe júıege degen senimdi álsiretýi múmkin», - dedi Qanat Mýsın.