Qanat Islamnyń chempıondyq ataǵyna burynǵy úmitkermen jekpe-jegi álemdik deńgeıde moıyndalmady

NUR-SULTAN. QazAqparat - 21 qańtarda orta salmaqtaǵy qazaqstandyq boksshy Qanat Islam (28-0, 22 KO) brıtandyq Djımmı Kellıge (25-2, 10 KO) qarsy jekpe-jekke shyǵady, dep habarlaıdy QazAqparat Sports.kz-ke silteme jasap.

Olardyń jekpe-jegi AQSh-tyń Florıda shtatyndaǵy Plant-Sıtıdegi boks keshiniń basty oqıǵasy bolady. Qazaqstan ýaqyty boıynsha jekpe-jek 22 qańtar kúni tańerteń ótedi.

Bedeldi BoxRec.com portaly «qazaqtyń» aldaǵy jekpe-jegine óte qarapaıym baǵa berdi – bes juldyzdyń bir ǵana juldyzy. Qanattyń buǵan deıin tehnıkalyq nokaýtpen jeńgen ekvadorlyq Djeıson Mındaǵa (14-5-1, 8 KO) qarsy oıyny da bir juldyzdy boldy. BoxRec-tiń Qytaı Altaıynyń týmasyna bergen eń joǵary baǵasy - úsh juldyz.

Esterińizge sala keteıik, Djımmı Kellı 2015 jyly óziniń otandasy Lıam Smıt (30-3-1, 17 KO) ıelengen birinshi orta sanattaǵy WBO álem chempıony ataǵyna úmitker bolǵan, biraq merziminen buryn jeńilgen.