Qanat Islam mektep oqýshylaryna sportta jetistikke jetýdiń jolyn kórsetedi

ASTANA. QazAqparat - «Qazaqstan - 2050» Jalpyulttyq qozǵalysy «Zııatker urpaq» jobasyn jalǵastyrady. Almaty oblysy boıynsha joba aıasynda dańqty kásibı boksshy, Beıjiń olımpıadasynyń qola júldegeri, QR eńbegi sińgen sport sheberi Qanat Islam 26 qyrkúıek kúni Іle aýdany Boraldaı aýylyndaǵy №15 mekteptiń oqýshylarymen kezdesedi. Bul týraly Jalpyulttyq qozǵalystyń medıa dırektory Qanat Áýesbaı habarlady.

Boksshy mekteptiń joǵary synyp oqýshylaryna sportta jetistikke jetýdiń syrlarymen bólisip, salaýatty ómir saltyn qalyptastyrýdyń mańyzyn túsindiredi.

«Jobanyń maqsaty - oqýda nemese qyzmette belgili bir jetistikterge qol jetkizgen bilimdi azamattardy aýyldaǵy jas jetkinshekterge bilim berý isine tartyp, tájirıbesimen bólisýge shaqyrý. Bul úshin biz «halyq muǵalimderinen» quralǵan eriktiler qozǵalysyn quryp, ony odan ári damytýdy kózdep otyrmyz. Aýyl jastaryna úlgi-ónege berý arqyly oryn alǵan kemshilikterdi joıyp, jetistikterge jetýine túrtki bolýdy kózdep otyrmyz», - deıdi qozǵalys medıa dırektory Qanat Áýesbaı.