Qanat Bozymbaev úıinde elektr energııasyn qalaı únemdeıtinin aıtty
«Árıne, elektr jaryǵy men jylýdy únemdeımin. Jylý berý júıesinde arnaıy qurylǵy ornatylǵan. Eger de jylý batareıasy belgili bir temperatýraǵa jetse, bul qurylǵy jylý men sýdy toqtatady. Bul óz kezeginde kommýnaldyq shyǵyndar boıynsha únemdeýge jol ashady. Al elektr energııasyna toqtalsaq, uıqyǵa jatar aldynda balalar úıdegi elektr jaryǵyn mindetti túrde óshirýge úıretilgen. Osy oraıda energııa tıimdiligi mádenıetine ekpin qoıyp otyrmyz», - dedi Bozymbaev.
Sonymen qatar ol «QazMunaıGaz» ǵımaratynda energııa qalaı únemdelip jatqandyǵyn aıtyp berdi.
«Energetıka mınıstrliginde de únemdeý júrip jatyr. Bizde shyǵystar boıynsha eń az kórsetkishterdiń biri tirkelgen. Búginde vedomstvo «QazMunaıGaz» ǵımaratynda ornalasqan. Saǵat 18:30-dan keıin bizdiń qyzmetkerlerdiń kompıýterleri avtomatty túrde óshiriledi. Bul rette adamdardy jumysta negizsiz ustamaımyz. Sebebi basshylar belgilengen jumys ýaqytynda maqsattar oryndalýy úshin protsesti tıimdi túrde uıymdastyrýy kerek. Eger de úlgermese, buǵan basshy kináli, óıtkeni jumys protsesin durys uıymdastyrmaǵan», - dedi vedomstvo basshysy.
Budan bólek, Q. Bozymbaev shaǵyn kólemdi jańartylatyn energııa kózderin qoldaý boıynsha zań jobasy ázirlenip jatqandyǵyn atap ótti. Bul sharalar halyqqa «jasyl» energetıka qurylǵylaryn tıimdi paıdalanýǵa múmkindik beredi.