Qanat Bozymbaev sý qubyrlarynyń tozý problemasyn qalaı sheshetinin aıtty

NUR-SULTAN. QazAqparat – Almaty oblysynda aýyldyq jerlerdegi sý qubyry jelileriniń tozýyn azaıtý maqsatynda shamamen 760 shaqyrym jelini qaıta jańartýǵa baǵyttalǵan 55 joba ázirlenýde. Bul týraly Úkimet otyrysynda Premer-Mınıstr Álıhan Smaıylovtyń saýalyna jaýap bergen Almaty oblysynyń ákimi Qanat Bozymbaev aıtty, dep habarlaıdy QazAqparat tilshisi.

«Aýyz sýmen qamtamasyz etýde Almaty oblysy aldyńǵy qatarda. Degenmen, sý qubyrlarynyń tozyǵy jetip tur. Bul máseleni sheshý úshin qandaı sharalar qabyldap jatyrsyzdar?» - dep suraǵan edi Úkimet basshysy óńir ákiminen.

Saýalǵa jaýap bergen aımaq basshysynyń dereginshe, oblysta – 742, onyń ishinde 10 qalalyq jáne 732 aýyldyq eldi meken bar.

«Qaladaǵy halyqtyń sýmen jabdyqtaý qyzmetterine qoljetimdiligi 99,5 paıyzdy qurap otyr. Biraq, sý qubyry jelileriniń tozýy – 44 paıyz. 732 aýyldyq eldi mekenniń 669-y ortalyqtandyrylǵan sýmen qamtamasyz etilgen. 54 eldi meken lokaldy sý júıesimen qamtylǵan. 9 aýyl turǵyny tasymaldanatyn sý paıdalanady. Bıyl aýyldyq eldi mekenderde 16 joba iske asyrylýda. 8,4 mlrd teńge bólindi. 209,6 shaqyrym jeli salynyp, qaıta jańǵyrtylatyn bolady. Sonymen qatar respýblıkalyq bıýdjetti naqtylaý kezinde 15 jobany iske asyrýǵa 6,1 mlrd teńgege bıýdjettik ótinim usynylyp, qoldaý tapty. Nátıjesinde jelilerdiń tozýy bıyl 41 paıyzǵa deıin tómendeıdi. Munan bólek, aýyldyq jerlerdegi shamamen 760 shaqyrym jelini qaıta jańartýdy kózdeıtin 55 joba ázirlenýde. Atalǵan jobalardy iske asyrý 2023-2024 jyldary qarastyrylady. Nátıjesinde, jelilerdiń tozýy 41 paıyzdan 32 paıyzǵa deıin tómendeıdi. Al qalalardaǵy jelilerdi qaıta jańartýǵa 13 jobalyq-smetalyq qujat ázirlenýde. Osy jobalardy iske asyrý jelilerdiń tozýyn 44 paıyzdan 38 paıyzǵa deıin kemitedi», - dedi Qanat Bozymbaev.