Qanat Bozymbaev resýrs únemdeý ustanymdaryn belsendi engizýge shaqyrdy

ASTANA. QazAqparat - Barlyq deńgeıde resýrs únemdeý ustanymdaryn engizý arqyly «jasyl» ekonomıkada eleýle kórsetkishterge qol jetkizýge bolady. Bul týraly búgin EKSPO-2017 kórmesi taqyryptarynyń aıasynda ótip jatqan «Jasyl kópir» seriktestik baǵdarlamasy» halyqaralyq forýmynda QR Energetıka mınıstri Qanat Bozymbaev málim etti, dep habarlaıdy QazAqparat.

«Qazaqstan ulttyq deńgeıde ulttyq ekonomıkany jańǵyrtýdyń aýqymdy baǵdarlamasyn júzege asyrýǵa kiristi. «Jasyl» ekonomıkaǵa kóshý úshin zańnamalyq baza quryldy. Atap aıtqanda, Qazaqstan Ortalyq Azııa elderi arasynda birinshi bolyp memlekettik deńgeıde «jasyl» ekonomıkaǵa kóshýdiń strategııalyq qujatyn qabyldap, ony tórt jyldan beri sátti iske asyryp keledi. Óńirlik turǵyda Qazaqstan energııalyq qaýipsizdik júıesin qamtamasyz etýde jaýapkershiligi joǵary ári senimdi qatysýshy retinde ózin kórsetýde. Bul rette, elimiz turaqty saıası jáne ekonomıkalyq damýǵa úndeý jasap keledi. Ótken jyly Parıjdik klımattyq kelisim kúshine endi. Barlyq elderdiń aldynda ǵasyrdyń sońyna deıin eki gradýstyq deńgeıdi ustap turý maqsaty tur. Qazaqstan parnıktik gazdar shyǵaryndylaryn 1990 jyldaǵy deńgeıge qaraǵanda 2030 jylǵa qaraı 15 paıyzǵa tómendetý mindetin ózine aldy. Jańaratyn energııa kózderin damytý, energııa únemdeý, energııa tıimdilikti arttyrý, kólikti ekologııalyq taza otyn túrlerine kóshirý, sondaı-aq ormandy alqaptardyń aýmaǵyn arttyrý sekildi sharalardy iske asyrý alǵa qoıylǵan maqsat-mindetti oryndaýǵa múmkindik beredi»,-dep toqtaldy mınıstr.

Onyń sózine qaraǵanda, «Jasyl kópir» seriktestik baǵdarlamasy «jasyl» tehnologııalar transferti jolymen belgilengen maqsattarǵa qol jetkizýde mańyzdy ról atqara alady. Joǵaryda atalǵan sharalardy júzege asyrýǵa qoldaý kórsetý úshin «jasyl» klımattyq qordyń jáne ózge de halyqaralyq qarjy ınstıtýttarynyń ınvestıtsııasyn tartý qarastyrylyp otyr.

Bozymbaevtyń paıymynsha, ekonomıkany ekologııalandyrýdy qamtamasyz etý maqsatynda jáne «jasyl» ekonomıkaǵa kóshý boıynsha maqsatty ındıkatorlarǵa qol jetkizý baǵytynda barlyq deńgeıinde, ıaǵnı jergilikti jerden jahandyq aýqymǵa deıin resýrsty únemdeýge aıryqsha mán berýi tıis.

Sonymen qatar mınıstr elimizde «Jasyl kópir» bastamasyn damytýdyń kelesi qadamy «Jasyl tehnologııalar» halyqaralyq ortalyǵyn qurýmen  jalǵasatynyn jetkizdi. Qazaqstan Prezıdentiniń bul bastamasyna búginde halyqaralyq uıymdar qoldaý bildirdi.

Konferentsııa barysynda «jasyl» tehnologııalar salasynda Avstrııalyq Tehnologııalar ınstıtýtymen, KaukoInternational Group Fın kompanııasymen yntymaqtastyq týraly memorandýmǵa qol qoıý josparlanǵan.

Forýmnyń ekinshi kúninde, ıaǵnı 13 shildede konferentsııa qatysýshylary «Arnasaı» Jasyl tehnologııalar ortalyǵyna barady (Arnasaı aýyly, Arshaly aýdany, Aqmola oblysy). Ol jerde ınnovatorlar men jastardyń qatysýymen «jasyl» tehnologııalar kórmesimen, Qazaqstannyń birinshi «jasyl» aýylymen, «EXPO-Camp» jasóspirimder lagerimen tanystyrý sharalary ótedi.