Qanat Bozymbaev ózin býldog pen mastıfke teńegenderge jaýap berdi

ASTANA. QazAqparat - QR Energetıka mınıstri Qanat Bozymbaev áleýmettik jelide ózi jáne basqaratyn mekemesi jaıly halyqtyń oı-pikirin baqylap otyratynyn jetkizdi, dep habarlaıdy QazAqparat tilshisi.

Ásirese, ózin býldogqa jáne mastıfke (ıt túrleri) teńegen jazbalar mınıstrdiń esinde qalǵan.

«Árıne, baspasóz qyzmeti jumys isteıdi, ózim de anda-sanda Feısbýkti ashyp, men týraly, mınıstrlik jumysy týraly halyqtyń ne jazyp jatqanyn qaraımyn. Qyzyqty pikirler bar, biraq onyń avtorlary óz esimderin jasyryp, túrli laqap atpen jazǵan. Sondyqtan, munyń vırtýaldy keńistik ekenin eskerip, kóz juma qaraımyz. Biraq, synı pikirler kóbeıip ketken jaǵdaıda, mindetti túrde nazar aýdaramyz. Bul bizdiń jumysymyzdaǵy basty baǵyt emes. Ázirge vırtýaldy keńistikke túgel kóshken joqpyz - dál qazirgi sátte ómir súrip jatyrmyz, janarmaı, kómir, dızeldi otyn dál qazir kerek, sondyqtan ózge jumystarǵa alańdaýǵa ýaqyt joq. Biraq, BAQ pen áleýmettik jeliler qaqqan dabyl - biz úshin mańyzdy», - dedi Qanat Bozymbaev Ortalyq kommýnıkatsııalar qyzmetinde ótken baspasóz máslıhatynda.

Vedomstvo basshysynyń aıtýynsha, áleýmettik jelidegi pikirler qaı oblysta benzın tapshylyǵy oryn alǵanyn anyqtaýǵa múmkindik bergen.