Qanat Bozymbaev óńirlerdi kómir daıyndaý isin jedeldetýge shaqyrdy

ASTANA. QazAqparat - QR Investıtsııalar jáne damý mınıstrliginiń málimetine sáıkes, kómir tasý jumysyna bul kúnde 29 myń ashyq vagon, sonymen birge «KTZE-Operator» qyzmetiniń 15 myń ashyq vagony, ózge de jeke menshik ıeleriniń 14 myń vagony jumyldyrylǵan, dep habarlaıdy QazAqparat tilshisi.

«Mınıstrlikpen jylytý maýsymynda tonnasy 70 myń teńgelik 312 myń tonna kólemindegi «áleýmettik» mazýtty tasymaldaý kestesi kelisildi. Ol aımaqtarǵa baǵyttalady», - dedi Qanat Bozymbaev OKQ-da ótken baspasóz máslıhatynda.

Ol óz sózinde elektrostantsııalardyń janar-jaǵarmaı qoımalarynda 3,4 mln tonna kómir men 79 myń tonna mazýt jınaqtalǵanyn, bul jalpy normatıvti kólemge saı keletinin atap ótti.

«Jylytý maýsymyna deıin kómir boıynsha normatıv Kókshetaý qalasyndaǵy №2 qazandyqta daıyn bolady. Ortalyqtandyrylǵan jylýmen qamtý aýmaǵyndaǵy qazandyqtarda 1,1 mln tonna kómir jınaqtalyp qaldy. Bul jospardyń - 84 paıyzy. Sonymen birge, 25 myń tonna mazýt bar. Bul jospardyń 18 paıyzy», - dedi mınıstr.

Vedomstvo basshysy Soltústik Qazaqstan oblysynda (jospardyń 16 paıyzy), Pavlodar oblysynda (jospardyń 51 paıyzy) kómir ázirligin, al mazýt ázirligin Aqmola (jospardyń 2 paıyzy) men Qaraǵandy (jospardyń 9 paıyzy) oblysynda ósirý kerektigin atap ótti.

«2018 jyldyń 8 aıy boıynsha Qazaqstanda jalpy 70 tonna kómir óndirilgen. Bul ótken jyldyń sáıkes kezeńimen salystyrǵanda 4,6 paıyzǵa artyq (66,9 mln tonna). Kommýnaldyq-turmystyq qajettilik úshin 8 aıdyń ishinde 6,7 tonna kómir tıelgen», - deıdi Qanat Bozymbaev.