Qanat Bozymbaev qorshaǵan ortany qorǵaý jolynda qolǵa alynǵan jumystar týraly aıtty

ASTANA. QazAqparat - Astanada azamattyq sektordyń ókilderimen kezdesý ótkizgen energetıka mınıstri Qanat Bozymbaev qorshaǵan ortany qorǵaý baǵytynda Qazaqstanda qandaı jumystar atqarylyp jatqany týraly aıtyp berdi, dep habarlaıdy «QazAqparat» HAA tilshisi.

«Energetıka mınıstrligi men Ádilet mınıstrligi ekologııalyq quqyqbuzýshylyqtarǵa qatysty «Ákimshilik quqyqbuzýshylyq» Kodeksi normalaryna ekologııalyq aıyppuldardyń mólsherin azaıtý baǵytynda birlese jumys atqarýda. Sonymen birge, tabıǵatty paıdalanýshylarmen seriktese qarym-qatynas ornatyp, profılaktıkalyq baqylaý túsinigin engizip jatyrmyz. Baqylaý adamdardyń densaýlyqtary men jalpy qorshaǵan ortany qorǵaý maqsatynda «Qazgıdromet» RMK aqparaty men ózge málimetter negizinde júrgiziletin bolady», - deıdi mınıstr.

Onyń aıtýynsha, Qazaqstan 2018 jyly Ekonomıkalyq seriktestik jáne damý uıymymen qorshaǵan ortany qorǵaý baǵytyndaǵy baǵdarlamaǵa sáıkes kelisimge kelip, «lastaýshy óteıdi» qaǵıdatyn engizýdi kózdep otyr.

«Aıyppul sanktsııasy boıynsha qoldanylatyn reforma júıesi qorshaǵan ortaǵa keltirgen zııandy qalpyna keltirýdi mindetteıdi. Qazaqstanda aıyppul sanktsııasy arqyly qorshaǵan ortany qorǵaý saraptamasy jasalady. Sol saraptamanyń negizinde kásiporyndardy ekologııalyq taza tehnologııalarǵa ınvestıtsııa salýǵa yntalandyratyn naqty usynystar ázirlenip, zańnamaǵa usynylatyn bolady», - deıdi mınıstr.

Ekologııany tekserý baǵytynda júrgiziletin saraptamalar men tekserýlerge vıdeo jəne aýdıo apparattary arqyly qatań talap qoıylǵaly otyr.