Qanat Bozymbaev kólik júrgizýshilerin sarań bolmaýǵa shaqyrdy

ASTANA. QazAqparat - QR Energetıka mınıstri Qanat Bozymbaev alys saparǵa shyǵatyn júrgizýshilerdi aıazdy kúnderi dızeldi otyn tańdaýǵa jaýapkershilikpen qaraýǵa shaqyrdy, dep habarlaıdy QazAqparat tilshisi.

«Eger aıazdy ýaqytta kólik óship qalsa, bul otynnyń sapasyzdyǵyn bildirmeıdi. Dızeldik otyndy klımattyq jaǵdaıǵa qaraı qoldaný kerek. Eger júrgizýshi Shymkent munaı óńdeý zaýytynan shyqqan dızeldi otyndy satyp alsa, 25 gradýstan tómen temperatýrada eshqaıda, ásirese soltústikke shyqpaýy kerek. Sarańdyq etýdiń qajeti joq, mınýs 40 gradýsqa deıin tótep beretin «arktıkany» quıý kerek», - dedi mınıstr QR Úkimetinde ótken baspasóz máslıhatynda.

Onyń aıtýynsha, qazirgi ýaqytta Qazaqstanda K4, K5 klasynyń sapaly otyndary shyǵarylady. Bıyldan bastap, K2 otynyn óndirýge tyıym salyndy. Mınıstr bul otynnyń qaldyqtary sáýir-mamyr aılarynda bitetinin aıtty.

Sondaı-aq, Qanat Bozymbaev Energetıka mınıstrliginiń janarmaı quıý beketterinde satylatyn otyn sapasy úshin jaýap bermeıtinin basa aıtty.