Qanat Bozymbaev elordaǵa keletin kógildir otynnyń boljamdy baǵasyn atady

ASTANA. QazAqparat - «Saryarqa» magıstraldy gaz qubyry arqyly keletin kógildir otynnyń 1 tekshe metrine elordalyqtar 40-50 teńge tóleýi múmkin. Bul týraly búgin elordada halyqqa esep berý kezdesýi barysynda QR Energetıka mınıstri Qanat Bozymbaev aıtty, dep habarlaıdy QazAqparat tilshisi.

«Aldyn ala esebi bar. Óıtkeni, gaz qubyrynyń aldyn ala quny belgili. Árıne, onyń da naqty quny tender ótkizilgennen keıin anyqtalady. Barlyǵy da kelisimshart qunyna táýeldi. Bul jobanyń quny tehnıkalyq-ekonomıkalyq negizdeme boıynsha 267 mlrd teńgeni quraıdy. Buǵan qosa, taratý jelileriniń tarıfi de bolady. Ázirshe osy qunyn eseptegende tarıf 44-ten 50 teńgege deıin bolady dep oılaımyz», - dep jaýap berdi mınıstr kezdesýge qatysýshylar tarapynan qoıylǵan suraqqa oraı.

Onyń aıtýynsha, bul tarıf elimiz boıynsha eń joǵary.

«Degenmen ol osynaý magıstraldy gaz qubyryna jumsalatyn ınvestıtsııany da jaba almaıdy. Biraq, biz jergilikti ákimdiktermen birge tarıftyń halyqqa qoljetimdi bolýy úshin jumys isteımiz. Tym bolmaǵanda halyqtyń áleýmettik az qamtylǵan tobyna ol qoljetimdi bolady», - dedi Qanat Bozymbaev.

Aıta keteıik, búgin mınıstr «Saryarqa» magıstraldy gaz qubyrynyń 1 kezeńi 2019 jyldyń jeltoqsanynda aıaqtalatyndyǵyn aıtqan bolatyn.