Qanat Bozymbaev dızeldik otyn baǵasynyń qymbattaý sebebin túsindirdi
Vedomstvo basshysy dızeldik otynnyń qysqy, jazǵy jáne maýsymaralyq bolyp bólinetinin eske salyp, qysqy otyn baǵasyn Energetıka mınıstrligi retteı almaıtynyn jetkizdi.
«Qazaqstan zaýyttary qysqy dızeldik otyndy shyǵarmaıdy jáne zaýyttarda bolǵan apat onyń qunyna yqpal etpeıdi. Qysqy dızeldik otyn 100 paıyz Reseı Federatsııasynan tasymaldanady», - dedi mınıstr Ortalyq kommýnıkatsııalar qyzmetinde ótken baspasóz máslıhatynda.
Onyń aıtýynsha, aýa temperatýrasy 10 gradýsqa tómendegende jazǵy otyndy, 20 gradýsqa túskende maýsymaralyq dızeldik otyndy paıdalanýǵa bolmaıdy. Sol sebepti, Pavlodar munaı óńdeý zaýytyndaǵy apat baǵa túzilimine áser etken joq.
Baspasóz máslıhatynda Qazaqstanǵa 90 myń tonnadan astam otyndy ımporttaý qajettigi basa aıtyldy.
«Jazǵy otyn boıynsha «QazMunaıGaz» óz sózinde turdy. Juma kúni keshke «QazMunaıGaz» elge 24-25 myń tonna otyn jetkizdi. Jalpy alǵanda Reseıden 80 myń tonna jazǵy jáne maýsymaralyq dızeldik otyn tasymaldandy», - dep tolyqtyrdy sózin Q.Bozymbaev.
Sonymen birge mınıstr qazaqstandyq naryqtyń munaı óńdeý zaýyttarynyń jumysyna tikeleı baılanysty ekenin atap ótti.
«Qazir Úkimette MÓZ jumysy ýaqytsha toqtaǵanda paıdalaný úshin dızeldik otyn, janarmaı, áýe kerosıniniń qoryn qurý máselesin qarastyrýdamyz», - dep málimdedi ol.
Vedomstvo basshysy Eýrazııa ekonomıkalyq odaǵy aıasyndaǵy munaı ónimderiniń biryńǵaı naryǵy janarmaı men otyn tapshylyǵy máselesin sheshýge kómektesedi dep sanaıdy.
Keltirilgen derekterge sáıkes, qazirgi ýaqytta jazǵy jáne maýsymaralyq dızeldik otynnyń baǵasy - 157 teńgeni, al qysqy otynnyń baǵasy 220-230 teńgeni quraıdy.