Qanat Bozymbaev dıqandarǵa dızel qanshadan satylýy kerektigin aıtty

NUR-SULTAN. QazAqparat – Energetıka mınıstri Qanat Bozymbaev bıylǵy kúzgi dala jumystaryn júrgizý úshin aýyl sharýashylyǵy taýar óndirýshilerine dızel otyny qalaı jetkizilip jatqanyn baıandady, dep habarlaıdy QazAqparat tilshisi.

Úkimet otyrysynda baıandama jasaǵan mınıstrdiń aıtýynsha, kúzgi dala jumystaryn júrgizý maqsatynda Energetıka mınıstrligi AShM-men birlesip, dızel otynyn jetkizý kestesin ázirlegen. Kestege sáıkes, qajettilik 395 myń tonna kóleminde bekitilgen.

«Osy jyldyń 29 tamyzyndaǵy jaǵdaı boıynsha dızel otynyn jetkizý 48,6 paıyzǵa oryndaldy. Josparlanǵan 395 myń tonnanyń 191,9 myń tonnasy tıep-jóneltildi. Endigi kezekte qyrkúıekte keste boıynsha 130,4 myń tonna, al qazanda 19,6 myń tonna dızeldi jóneltý josparlanýda», - dedi mınıstr.

Qanat Bozymbaevtyń aıtýynsha, dızeldi jetkizý tólemge sáıkes júrgizilip jatyr. Mınıstr sondaı-aq, aýyl sharýashylyǵy taýar óndirýshileri úshin dızel otynynyń baǵasyna da toqtaldy.

«2019 jyldyń kúzgi dala jumystaryn júrgizý úshin dızel otynynyń baǵasy tonnasyna 198 myń teńgeni quraıdy (164 teńge/lıtr, qosymsha qun salyǵyn qosa alǵanda). Jetkizý men saqtaýdy esepke alǵanda, aýyl sharýashylyǵy taýar óndirýshileri úshin boljamdy baǵa lıtrine shamamen 178 teńge. Bul janar-jaǵarmaı stansalaryndaǵy baǵalarǵa qaraǵanda 15 teńgege arzan. Negizinen aýyl sharýashylyǵy taýar óndirýshileri úshin dızel otynyna arzandatylǵan baǵany zańdy túrde bekitý mınıstrliktiń quzyretine kirmeıtinin atap ótý qajet. Aýyl sharýashylyǵy qajettigi úshin dızel otynynyń arzandatylǵan quny janar-jaǵarmaı naryǵynyń qatysýshylarymen kelisim boıynsha anyqtalady. Ári ony munaı ónimderiniń resýrs ıeleri ózderi belgileıdi», - dedi ol.