Qanat Bozymbaev Bakýde ótken OPEK+ otyrysyna qatysty

BAKÝ. QazAqparat - QR energetıka mınıstri Qanat Bozymbaev 17-18 naýryz aralyǵynda Bakýde ótken OPEK+ birlesken mınıstrlik monıtorıng komıtetiniń otyrysyna qatysty. Bul týraly atalmysh vedomstvonyń baspasóz qyzmeti habarlady.

Monıtorıng komıtetiniń qatysýshylary 2018 jylǵy jeltoqsanda qabyldanǵan óndirý kólemin qysqartý týraly sheshimniń oń áserin atap ótti. 2018 jylǵy jeltoqsannan bastap munaı jáne munaı ónimderiniń qoımalyq qorlarynyń álemdik kólemi aıtarlyqtaı tómendegeni baıqalady.

Otyrysta naryqty odan ári turaqtandyrý úshin OPEK+ kelisimine qatysýshy barlyq elder qabyldaǵan mindettemelerdi saqtaýdy jalǵastyrý qajettigi týraly da sóz boldy. Qazaqstan otyrysqa qatysýshylarǵa 2019 jyldyń alty aıynyń qorytyndysy boıynsha óndiristi qysqartý josparyn oryndaý nıetin bildirdi.

Sondaı-aq, monıtorıng komıtetiniń kezdesýi aıasynda Q.Bozymbaev Saýd Arabııasynyń energetıka, ónerkásip jáne mıneraldyq resýrstar mınıstri Halıd ál-Falıhpen, Ázirbaıjan energetıka mınıstri Parvız Shahbazovpen birqatar ekijaqty kezdesýler ótkizdi, onda taraptar yntymaqtastyqtyń birqatar aspektilerin talqylady.

Esterińizge sala keteıik, 2018 jyldyń jeltoqsanynda OPEK+ elderi munaı óndirýdi 1,2 mln barrelge qysqartý týraly kezekti sheshim qabyldaǵan bolatyn. Qazaqstan óndiristi 40 myń barrelge qysqartý boıynsha ózine mindetteme qabyldap, osy sheshimge qosyldy.

OPEK+ kelisimi munaı naryǵyn turaqtandyrýǵa eleýli áser etti. Mámile munaı baǵasyn 60-70 dollar dálizinde bekitýge kómektesti.