Qanat Bozymbaev antıreseılik sanktsııalardan keletin qaýip-qater jóninde pikir bildirdi
«Qazirgi ýaqytta bul máseleni muqııat zerttep jatyrmyz. Bul sanktsııalar AQSh Senatynda qaralyp jatqanda-aq reseılik jáne amerıkalyq áriptestermen baılanysta bolǵanymyzdy jasyrmaımyn. Onda ne jazylatynyn da aldyn ala túsindik», - deıdi Q.Bozymbaev Úkimet úıinde ótken baspasóz máslıhatynda jýrnalıster suraǵyna jaýap bere otyryp.
Mınıstr Qazaqstannyń eń aldymen Kaspıı qubyr jelisi konsortsıýmyna (KQK) qatysty alańdaýshylyq bildirgenin atap ótti.
«Qazir KQK saraptama júrgizýmen aınalysyp jatyrmyz. Aıtarlyqtaı qaýip-qater joq sekildi. Sebebi, KQK qýattylyǵyn arttyrý boıynsha negizgi jumys atqarylyp qoıǵan. Tek birneshe nysandardy iske qosý máselelerin aıaqtaý ǵana qalǵan. Osyǵan baılanysty osy qubyr jelisi júıesine túsetin Qashaǵan jáne Teńiz munaılarynyń bolashaqtaǵy kólemimen esh qıyndyq bolmaýy tıis», - dedi Q.Bozymbaev.
Alaıda mınıstr Volgodon máselesiniń bar ekenin eske saldy. «Teńiz ken ornyn keńeıtýdegi Volgodonǵa qoljetimdilik máselesi bar. Munda da reseılik jáne amerıkalyq áriptesterimizben belsendi jumys isteıtin bolamyz. Búgingi kún men aldaǵy 3-5 jyl týraly aıtar bolsaq, qandaı da bir qaýip-qaterdi baıqaǵan joqpyz. Ózderińiz bilesizder, gazdy eki memleketke satyp otyrmyz. Reseımen kelisimshart qazan aıynan beri óz kúshinde, Qytaımen gaz eksporty jóninde kelisimshart bekittik. Qytaıdaǵy múmkindikterimiz 10 mlrd-qa deıin jetedi, bıylǵy gazdy Gazprom-gaz arqyly satatyn shyǵarmyz. Baký, Batýmı qalalarynda da munaı qubyrlaryn paıdalaný múmkindikteri iske qosylmaǵan, qajet bolǵan jaǵdaıda qostyrýǵa bolady. Biraq ázirge ekonomıka boıynsha eń ońaı tásili - Novorossıısk pen KQK. Sondyqtan, bul másele boıynsha ázirge esh qater kórip otyrǵan joqpyz», - dedi Qanat Bozymbaev.