Qanat Bozymbaev óńirler men qyzmetterdiń 2025 jylǵy qysqy kezeńge jáne sý tasqynyna daıyndyǵyn tekserdi

<p>ASTANA. KAZINFORM - Premer-Mınıstrdiń orynbasary Qanat Bozymbaev Tótenshe jaǵdaılardyń aldyn alý jáne olardy joıý jónindegi vedomstvoaralyq memlekettik komıssııanyń otyrysyn ótkizdi. Oǵan mınıstrlik ókilderi, oblys jáne qala ákimderi qatysty.</p>

QR Úkimeti baspasóz qyzmetiniń habarlaýynsha, kún tártibinde úsh másele: kelesi jylǵy sý tasqyny qaýpi bar kezeńge daıyndyq, jeke sektordaǵy jylý berý maýsymy, kommýnaldyq jáne jol qyzmetteriniń qysqy kezeńge daıyndyǵy qaraldy.

Vıtse-premer Qanat Bozymbaevtyń tapsyrmasy boıynsha óńirlerdiń 2025 jylǵy sý tasqyny qaýpi bar kezeńge daıyndyǵyna tekserý júrgizildi.

Búgingi tańda óńirlerde 122,6 shaqyrym drenaj júıesi salynyp, jóndeldi, 1545 sý ótkizý qurylysy ornatylyp, aýystyryldy, 1270 shaqyrym kanal men 21 069 shaqyrym aryq tazartyldy, 101 gıdrotehnıkalyq qurylysqa aǵymdaǵy jóndeý júrgizildi.

Sonymen qatar tekserý nátıjeleri birqatar oblysta ózen arnasy jaǵalaýyn nyǵaıtý jáne túbin tereńdetý boıynsha jumystar áli aıaqtalmaǵanyn kórsetti.

Aqmola, Aqtóbe, Batys Qazaqstan, Pavlodar, Soltústik Qazaqstan jáne Qostanaı oblystarynyń 84 eldi mekeninde kúrdeli qurylys, qorǵanys bógetterin qalpyna keltirý jáne nyǵaıtý jumystary júrgizilýde.

«Óńir ákimdi kúzdiń sońyna deıin eldi mekenderdiń aınalasyna topyraq úıý, sý burý arnalaryn tazartý jáne ózenderdi qalypqa keltirý jumystaryn aıaqtaý kerek. Sý resýrstary jáne ırrıgatsııa mınıstrligi gıdrotehnıkalyq qurylystardy rekonstrýktsııalaý jáne jańǵyrtý jumystaryn jedeldetýi qajet», — dep tapsyrdy Premer-Mınıstrdiń orynbasary.

Turǵyn úı sektorynda jylý berý maýsymyn ótkizýge daıyndyq barysy týraly esepter tyńdaldy.

Turǵyn úıler men ózge de nysandardyń ishinde ornatylǵan avtonomdy jylytý júıeleri úlken alańdaýshylyq týdyryp otyr. Osylaısha, elimiz boıynsha ereje buzyp, avtonomdy jylytqyshty 641 ǵımarat áli de paıdalanýda.

«Tótenshe jaǵdaılar mınıstrligine memlekettik organdarmen jáne ákimdiktermen birlesip, turǵyn úı sektorynda órt qaýipsizdigi aılyǵyn ótkizýdi tapsyramyn. Gaz ınspektsııasyn iske qosyńyzdar. Pesh jaǵatyn úılerdi, birinshi kezekte halyqtyń áleýmettik osal toptaryn esepke alý qajet. Ondaı úılerdiń barlyǵynda ıisti anyqtaıtyn gaz datchıkteri ornatylýy tıis», — dedi Qanat Bozymbaev.

Qys mezgilinde joldardaǵy qyzmet kórsetý sapasy týraly Kólik mınıstrligi esep berdi.

Otyrysta Aqtóbe oblysyndaǵy «Samara-Shymkent» tasjoly ýchaskesine jáne Jambyl oblysy Qordaı aýdanyndaǵy joldarǵa erekshe nazar aýdaryldy.

Іshki ister mınıstrligine boran kezinde tıisti qyzmetterdiń habarlamalaryn elemeıtin júrgizýshilerge jaýapkershilikti kúsheıtý máselesin pysyqtaý tapsyryldy.

«Aldaǵy «Qys-2024» oqý-jattyǵýy sheńberinde joldarda muz qatyp, kólikterdiń qozǵalýyna qıyndyq týyndaǵan jaǵdaıda ýákiletti organdardyń is-qımyl algorıtmin pysyqtaý kerek. Tótenshe jaǵdaılar mınıstrligine oqý-jattyǵýǵa tıisti daıyndyq jumystaryn qamtamasyz etýdi, máselelerdi sheshý boıynsha qabyldanyp jatqan sharalardy tekserýdi tapsyramyn. Biz qys mezgiliniń qaýipsiz ótýin qamtamasyz etýimiz qajet»,— dep atap ótti vıtse-premer.