Qanat Bozymbaev Qostanaı oblysyna jumys saparymen bardy
Qanat Bozymbaev aımaq basshysy Qumar Aqsaqalovpen birge Amangeldi aýdany Amangeldi aýylyndaǵy sý basqan úılerdi aralap, oblys ortalyǵyna aparatyn joldardyń jaǵdaıyn zerdelep, halyqqa kómek kórsetý boıynsha eriktiler ortalyǵyna bardy. Ortalyqtyń uıymdastyrýshysy Aıbek Tanabaev aýdanǵa gýmanıtarlyq kómektiń áli de kelip jatqanyn aıtty. Munda 3 kún ishinde 20 tonnadan astam azyq-túlik, kıim-keshek jáne gıgıenalyq quraldar jetkizildi.
Jangeldi aýdanynda Premer-Mınıstrdiń orynbasary Kólqamys aýylyndaǵy sý tasqyny bolǵan jerge baryp, sondaı-aq qarǵyn sýdan zardap shekken Kókalat aýylynyń turǵyndarymen kezdesti. Aýdandy áýeden baqylaý barysynda «Arqalyq – Ekidin» aýdandyq mańyzy bar joldaǵy apatty kópirge tekserý júrgizilip, qala ákimi Ekidin kentindegi sý tasqynynan qalyptasqan jaǵdaı týraly baıandady.
Munan soń polıtehnıkalyq kolledjdiń jataqhana ǵımaratyndaǵy qutqarý pýnktine ornalastyrylǵan Qyzyljuldyz aýylynyń turǵyndarymen kezdesý ótti.
Sý tasqynyna qarsy sharalardy úılestirý jáne qarǵyn sý júrý kezeńiniń saldaryn joıý jónindegi oblystyq jedel shtab Arqalyq qalasynda ornalasqan. Oblystyń barlyq aýmaǵynda oblystyq, qalalyq jáne aýdandyq jedel shtabtar jumys isteıdi. Shyǵyndy baǵalaý boıynsha komıssııa quryldy.
Aıta ketsek, Qostanaı oblysynyń ońtústigindegi 75 jer úıdi sý basqan. 13 sý shaıǵan jáne 7 búlingen jol (1 kópir, 6 jol jamylǵysy) baqylaýda. 12 eldi mekende kólik qatynasy joq. 1,2 myń adam evakýatsııalandy, onyń 408-i - bala. Qarǵyn sýdy sorý, qaptardy tóseý jumystary jalǵasyp jatyr. Sý tasqyny bastalǵannan beri 686,2 myń tekshe metrden astam qarǵyn sý sorylyp, 16 myńnan astam qap tóselip, 1,3 myń tonna ınertti materıal tógildi. Qutqarý jumystaryna 1,7 myń adam, 517 tehnıka, 30 sýda júzý quraly jáne 2 ushaq jumyldyrylǵan.
Jumys sapary barysynda Qanat Bozymbaev aýdan jáne qala ákimderimen, oblystyq qyzmetter men basqarma basshylarymen birqatar kezdesý ótkizdi. Vıtse-premer apattyq-qutqarý jumystaryn ári qaraı júrgizý, qutqarylǵan adamdardy barlyq qajetti zattarmen qamtamasyz etý, shyǵyndy baǵalaý, búlingen úıler men ınfraqurylymdy qalpyna keltirý boıynsha birqatar tapsyrma berdi.
«Adamdardyń qaýipsizdigin qamtamasyz etý jáne zardap shekkenderge kómek kórsetý úshin barlyq jaǵdaıdy jasaý kerek. Sý tasqynynyń zardaptaryn joıý jumystary táýlik boıy júrgizilýi tıis. Óńirlerdi qalpyna keltirý úshin barlyq qajetti resýrstar bólinedi», — dedi Shtab basshysynyń orynbasary.