Qanat Bozymbaev: Qazaqstan — sý resýrstarynyń jartysyna jýyǵyn kórshilerimen bólisetin el

<p>DÝShANBE. KAZINFORM — Premer-Mınıstrdiń orynbasary Qanat Bozymbaev Dýshanbede (Tájikstan) ótken «Sý turaqty damý úshin, 2018-2028 jyldar» halyqaralyq is-qımyl onjyldyǵy boıynsha úshinshi halyqaralyq konferentsııada sóz sóıledi. </p>

Joǵary deńgeıdegi is-sharany Tájikstan Respýblıkasynyń Úkimeti uıymdastyrdy. Oǵan BUU-ǵa múshe memleketterdiń, halyqaralyq uıymdardyń jáne azamattyq qoǵamnyń ókilderi qatysty.

Dýshanbe sý protsesi klımattyń ózgerýine, ortaq sýlardy basqarýǵa jáne úkimetaralyq kelisimderdi júzege asyrýǵa baılanysty jahandyq sý máseleleri boıynsha jańa sheshimder ázirleýge arnalǵan alań bolyp sanalady.

Vıtse-premer óz sózinde Qazaqstan klımattyń ózgerýiniń saldaryn eńserý jónindegi jahandyq bastamalardy, sondaı-aq sý resýrstaryn utymdy paıdalaný máselelerine álemdik qoǵamdastyqtyń nazaryn aýdarý jónindegi Tájikstannyń kúsh-jigerin tolyq qoldaıtynyn atap ótti.

Búginde Qazaqstannyń sý saıasaty sý sharýashylyǵy ınfraqurylymyn jańǵyrtýǵa jáne damytýǵa, aqparattyq júıelerdi, normatıvtik-quqyqtyq bazany jetildirýge jáne transshekaralyq yntymaqtastyqty kúsheıtýge baǵyttalǵan.

Qanat Bozymbaev Ortalyq Azııadaǵy transshekaralyq sýlardy basqarý boıynsha ózara is-qımyldyń odan ári strategııasyn ázirleý qajettigin atap ótti.

«Klımattyń sý resýrstaryna áser etý máselesinde shekara joq. Klımattyń ózgerýine jáne sýdyń jetispeýshiligine áreket etý sharalary barlyq elder arasyndaǵy yntymaqtastyqty jáne barlyq múmkin kúshter men quraldardy jumyldyrýdy talap etedi. Qazaqstan — sý resýrstarynyń jartysyna jýyǵyn kórshilerimen bólisetin el. Biz úshin transshekaralyq sý aǵyndary boıynsha yntymaqtastyq sýdy tıimdi basqarýdy jáne ekojúıelerdi qorǵaýdy qamtamasyz etý turǵysynda mańyzdy», — dedi vıtse-premer.

Aral teńizindegi ekologııalyq jaǵdaı erekshe alańdaýshylyq týǵyzady.

5,5 mıllıon ga shóldiń paıda bolýy búkil aımaqtaǵy adamdardyń densaýlyǵy men ekojúıeniń jaǵdaıyna teris áser etedi.

«Bul syn-qaterler sý, energetıka jáne azyq-túlik resýrstaryna suranystyń artýymen birge Aral teńizi basseıninde sýdy utymdy paıdalanýdy qamtamasyz etý úshin naqty sharalar qabyldaýdy talap etedi. Osyǵan baılanysty Kókaral bógetin saqtaý jáne Syrdarııa ózeniniń atyraýyn qalpyna keltirý sııaqty sharalardy iske asyrý arqyly tabıǵı sý nysandaryn saqtaý jáne qalpyna keltirý mańyzdy», — dep atap ótti vıtse-premer.

Dýshanbe sý protsesi aıasynda Qanat Bozymbaev Tájikstan Premer-Mınıstriniń orynbasary Sýlaımon Zıezodamen, Reseı Prezıdentiniń kómekshisi, klımat máseleleri jónindegi arnaıy ókili Rýslan Edelgerıevpen, Ózbekstan prezıdentiniń keńesshisi Shýhrat Ganıevpen, sondaı-aq Eýropalyq Odaqtyń Ortalyq Azııa boıynsha arnaıy ókili Terı Hakalamen kezdesti.