Bozymbaev BQO-daǵy turǵyn úı qurylysynyń qarqynyn jedeldetýdi tapsyrdy

<p>ASTANA. KAZINFORM &mdash; Premer-Mınıstrdiń orynbasary Batys Qazaqstan oblysyndaǵy úıler qurylysynyń barysymen tanysyp, halyqpen kezdesti. Bul týraly Úkimettiń baspasóz qyzmeti málim etti.</p>

Sapar barysynda Qanat Bozymbaev BQO ákimi Narıman Tóreǵalıevpen jáne ónerkásip jáne qurylys vıtse-mınıstri Qýandyq Qajkenovpen birge birneshe kentterge — Qaratóbe aýdanynyń Qorjyn aýylyna, Syrym aýdanynyń Óleńti men Jympıty aýylyna, sondaı-aq Oral qalasynyń Juldyz shaǵyn aýdanyn, Zashaǵan jáne Derqul aýyldaryn aralady.

«Qorjyn aýylynda 90 úsh bólmeli turǵyn úıdiń qurylysy júrip jatyr. Munda elektr jáne jylytý jumystary tolyǵymen aıaqtaldy. 79 úıde ishki árleý jumystary aıaqtaldy. Nysanda 6 merdiger kompanııa jumys isteıdi. Olarmen kezdesýde Qanat Bozymbaev árleýshiler brıgadalarynyń sanyn kóbeıtýdi jáne qurylysty sapaly aıaqtaýdy tapsyrdy», — delingen habarlamada.

Syrym aýdanynyń Óleńti men Jympıty aýyldarynda 68 tıptik jeke turǵyn úı jáne 10 eki páterli 3 bólmeli úılerdiń qurylysy júrgizilýde. Barlyǵy 45 úı tapsyryldy, qalǵandary paıdalanýǵa daıyn.

«Oral mańynda aýqymdy qurylys bastaldy. Munda turǵyn úı, sonyń ishinde sý tasqyny kezinde jalǵyz baspanasynan aıyrylǵan saıajaı turǵyndary úshin salynýda. Juldyz shaǵyn aýdanynda 17 qurylys kompanııasy 191 tıptik úı salýda. Derqul shaǵyn aýdanynda 103 úı tapsyrýǵa daıyn tur, olar árleý jumystary satysynda tur. Zashaǵan kentinde 70 úıde ishki árleý jumystary júrgizilýde, taǵy 7 úıde — jóndeý jumystary júrgizilýde. Vıtse-premer ákimdikke qurylys qarqynyn jedeldetýdi tapsyrdy», — dep habarlady Úkimettiń baspasóz qyzmeti.

BQO ákimi Narıman Tóreǵalıevtiń aıtýynsha, úılerdiń kópshiligi 1 qyrkúıekke deıin paıdalanýǵa beriledi. Ol sondaı-aq Memleket basshysynyń tapsyrmasyna sáıkes 9 994 otbasy jalpy somasy 3,7 mlrd teńgege 100 AEK mólsherinde bir rettik tólem alǵanyn, taǵy 10 222 otbasyǵa keltirilgen zalal úshin ótemaqy tólengenin habarlady. Ótemaqynyń jalpy mólsheri 3,68 mlrd teńgeni qurady.