Kanar araldaryndaǵy janartaýdyń oıanýy: Áýejaı jumysyn toqtatty

NUR-SULTAN. QazAqparat – Palma ıspan aralyndaǵy janartaýdyń atqylaýynan kúl jınalyp, áýejaı óziniń jumysyn toqtatty, dep habarlaıdy QazAqparat euronews silteme jasap.

Senbige josparlanǵan barlyq reıs toqtatyldy. Jarty ǵasyr boıy uıqyda jatqan Kýmbre-Veha janartaýy ótken demalys kúni oıandy. Jedel evakýatsııanyń arqasynda eshkim zardap shekpedi, alaıda lava 400-den astam úıdi qıratyp, 14 shaqyrym joldy jermen jeksen etti.
Palma áýejaıynda jumysshylar aýmaqty jáne ushyp-qoný jolaqtaryn tazartýǵa kiristi. Áýejaıdyń jumysyn qashan qaıta jandandyratyny ázirge belgisiz. Jolaýshylar abdyrap qaldy.

«Bizge Tenerıfege deıin joldy tólep berip, áýejaı qaıta ashylmaıynsha, osy jerde qalýǵa usynys jasaldy», - dedi týrıst.
Qazirgi kezde araldan tek sý arqyly ketýge múmkindik bar.
«Biz parom arqyly basqa aralǵa ótýge árekettenip jatyrmyz, munda demalýǵa kelgen edik», - dedi saıahatshy áıel.
Portta paromǵa bılet alýǵa tizilgender kezekke turýda. Keme kompanııalary suranystyń kóbeıýine baılanysty reıster sanyn arttyrýǵa ýáde berdi.
Eske sala keteıik, ótken jeksenbide Ispanııanyń Palma aralynda (Kanar araldary avtonomdy qaýymdastyǵy) terbelisi tómen birneshe jer silkinisinen keıin janartaý oıanǵany habarlanǵan bolatyn. Osyǵan baılanysty sol kúni keshke bes myń adam evakýatsııalandy.