Kanadanyń taý-ken sektoryndaǵy kompanııalar Qazaqstan naryǵyna qyzyǵýshylyq tanytyp otyr
Konferentsııa jyl saıyn álemniń 50 elinen 5 myńǵa jýyq qatysýshyny qabyldaıdy, dep habarlaıdy QazAqparat QR Syrtqy ister mınıstrliginiń resmı saıtyna silteme jasap.
Іs-shara aıasynda qazaqstandyq delegatsııa elimizben iskerlik yntymaqtastyqty damytý múmkindigin qarastyratyn Kanadanyń taý-ken sektorynyń iri jáne kishi kompanııalarymen birqatar kezdesýler ótkizdi.
Kompanııa basshylary Qazaqstanda jer qoınaýyn paıdalaný jáne geologııalyq izdenister salasynda júrgizilip jatqan jumysy týraly aqparatty oń qabyldap, qazaqstandyq naryqqa kirý boıynsha naqty jobalar men josparlardy talqylaýǵa daıyn ekendigin bildirdi.
Qazaqstan ókilderi Kanada-Eýrazııa saýda palatasy uıymdastyrǵan Ortalyq Azııa, Túrkııa jáne Mońǵolııa elderiniń taý-ken salasynyń ınvestıtsııalyq múmkinshilikterine arnalǵan «Mining in a transitional world: trends and opportunities in Eurasia» sessııasynyń konferentsııasynda sóz sóıledi.
Elshi óz sózinde qatysýshylardy Qazaqstandaǵy ekonomıkalyq reformalardyń iske asyrylý barysy týraly, sondaı-aq elimizdegi iskerlik ortany odan ári jaqsartý boıynsha qabyldanyp jatqan sharalar týraly habardar etti. Óz prezentatsııalarynda Elshilik pen «Kazakh Invest» AQ ókilderi Qazaqstandaǵy tabıǵı resýrstardyń, onyń ishinde sırek kezdesetin metaldardyń jańa ken oryndarynyń bar áleýetine erekshe nazar aýdardy.
Sapar aıasynda qazaqstandyq delegatsııa Brıtandyq Kolýmbııa provıntsııasynyń 30 kompanııasynyń basshylarymen iskerlik kezdesýge de qatysty. Bul is-sharany Qazaqstandaǵy prezıdenttik saılaýda táýelsiz baqylaýshy retinde Astanaǵa barǵan kanadalyq senator Vıktor Oýdyń uıymdastyrýymen ótkizildi.
A. Kamaldınov óz sózinde elimizdiń bıznes júrgizý úshin neǵurlym qolaıly zańnamalyq jaǵdaılar jasaýdaǵy jetistikteri týraly habardar etti, sondaı-aq Qazaqstanda jumys istep jatqan kanadalyq kompanııalardyń tabys tarıhy týraly aıtty.
«Kanadalyq kompanııalar 2023 jyldyń 5 naýryzynda Torontoda ótetin «Prospectors & Developers Association of Canada» halyqaralyq taý-ken konferentsııasy sheńberinde uıymdastyrylatyn Qazaqstan-Kanada bıznes-forýmyna qatysýǵa shaqyryldy»,-delingen habarlamada.
Foto: gov.kz