Kanadalyq týrıst smartfonǵa táýeldiligin Mońǵolııaǵa sapary arqyly eńserdi

NUR-SULTAN. QazAqparat – Kanada azamaty Djeımı Klark smartfonǵa táýeldiligin jeńe almaı júrgen ulyn Mońǵolııaǵa ertip aparyp, áke men bala 2 200 shaqyrymdy júrip ótken, dep habarlaıdy QazAqparat tilshisi montsame.mn saıtyna silteme jasap.

Djeımı Klark qyzyqty saparǵa ulyn ertip alypty. Kanadalyq azamat aqparattyq tehnologııalar zamanynda ulynyń ózimen ashyq áńgimelesýden qalyp, otbasylyq qundylyqtardy ekinshi orynǵa ysyra bastaǵanyn aıtady. Mine, osy problemany jeńý úshin ákesi ómirindegi eń uzaq saparǵa ulymen birge shyǵady.

BBC agenttigine suhbat bergen Djeımı Klark ulymen birge 28 shildede Mońǵolııaǵa jetip, jaıaý, salt atty, keıde mototsıklmen 2 200 shaqyrymdy júrip ótkenin aıtyp bergen. Jıhangezder jolda kúrke quryp, uıyqtapty. Osy aralyqta Klark mobıldi telefondy paıdalana almaǵan. Alaıda uzaq joldan keıin uly osynaý sapardy ómiriniń ǵanıbetti sátterine teńep otyr. Kanadalyq azamat sapar barysynda oı túıip, ákesimen qarym-qatynasyn qaıta jaqsartqan eken.

Djeımı Klark: «Bul sapar ulymdy tereń túsinýge múmkindik berdi. Ulymnyń úlken azamat bolǵanyna kózim jetti», - dedi.